মঙলবাৰে উত্তৰ প্ৰদেশৰ লক্ষ্ণৌৰ সাংসদ-বিধায়ক আদালতত আত্মসমৰ্পণ কৰে কংগ্ৰেছৰ সাংসদ তথা লোকসভাৰ বিৰোধী দলপতি ৰাহুল গান্ধীয়ে। এই আত্মসমৰ্পণ ভাৰতীয় সেনাক লৈ অপমানসূচনক মন্তব্য কৰাৰ সন্দৰ্ভত দাখিল কৰা মানহানিৰ গোচৰৰ অধীনত কৰা হৈছিল।
আদালতত আত্মসমৰ্পণ কৰাৰ লগে লগে ৰাহুল গান্ধীৰ অধিবক্তাই জামিন আবেদন দাখিল কৰে, যিটো আদালতে মানি লয় আৰু তেওঁক জামিন মঞ্জুৰ কৰা হয়।
উল্লেখ্য যে, ২০২২ চনৰ ১৬ ডিচেম্বৰত ভাৰত জোড়ো যাত্ৰাৰ সময়ত ৰাহুল গান্ধীয়ে সংবাদ মাধ্যমৰ আগত গালৱান উপত্যকাৰ সংঘৰ্ষৰ কথা উল্লেখ কৰি অভিযোগ কৰিছিল, ‘চীন সৈন্যই আমাৰ জোৱানক হত্যা কৰিছে, কিন্তু সংবাদ মাধ্যমে তেওঁলোকক প্ৰশ্ন নকৰে।’ তেওঁৰ এই বক্তব্যক সেনাবাহিনীক অপমানজনক বুলি অভিহিত কৰা হৈছিল।
সীমান্ত পথ সংস্থাৰ (বি আৰ অ’) অৱসৰপ্ৰাপ্ত সঞ্চালক উদয় শংকৰ শ্ৰীবাস্তৱে সেনাক লৈ দিয়া এই বক্তব্য সন্দৰ্ভত ৰাহুল গান্ধীৰ বিৰুদ্ধে আদালতত এজাহাৰ দাখিল কৰে। অভিযোগত উল্লেখ কৰা হৈছে যে ভাৰতীয় সেনাৰ ভাবমূর্তি কলংকিত কৰাৰ উদ্দেশ্যে ৰাহুল গান্ধীয়ে ইচ্ছাকৃতভাৱে মিছা আৰু মানহানিকাৰক বক্তব্য আগবঢ়াইছে৷
লক্ষ্ণৌৰ সাংসদ-বিধায়ক আদালতে ৰাহুল গান্ধীক এই গোচৰৰ অভিযুক্ত বুলি গণ্য কৰি চমন জাৰি কৰিছিল। মঙলবাৰে আদালতৰ সন্মুখত আত্মসমৰ্পণ কৰাৰ পিছতে তেওঁ জামিন লাভ কৰে। এতিয়া এই গোচৰৰ পৰৱৰ্তী শুনানিৰ তাৰিখ আদালতে নিৰ্ধাৰণ কৰিব, য’ত পক্ষসমূহৰ যুক্তিৰ শুনানি গ্ৰহণ কৰা হ’ব।
