পাকিস্তানৰ পৰা আহিছে এটা ডাঙৰ খবৰ। তিনিটাকৈ ধাৰাবাহিক বিস্ফোৰণত কঁপি উঠিল সন্ত্ৰাসবাদক প্ৰশ্ৰয় দি অহা পাকিস্তানৰ অন্যতম ডাঙৰ চহৰ লাহোৰ। লাহোৰ বিমান বন্দৰৰ সমীপত হোৱা এটা বিস্ফোৰণৰ শব্দ বহু দূৰলৈ শুনা বুলিও ৰাষ্ট্ৰীয় তথা আন্তঃৰাষ্ট্ৰীয় সংবাদ মাধ্যমত প্ৰকাশ পাইছে।
বিস্ফোৰণৰ পিছতেই সাধাৰণ লোকৰ মাজত হুৱা দুৱা লাগে আৰু সমগ্ৰ লাহোৰ অঞ্চলতেই ছাইৰেণৰ শব্দ শুনা যায়। আৰক্ষীয়ে প্ৰদান কৰিছে এই তথ্য।
নিউজ এজেন্সি ৰয়টাৰ্ছে প্ৰকাশ কৰা প্ৰতিবেদন অনুসৰি, সম্প্ৰতি পাকিস্তান প্ৰশাসনে বিস্ফোৰণৰ সঠিক স্থান আৰু ইয়াৰ কাৰণ জানিবলৈ তদন্ত অব্যাহত ৰাখিছে।
প্ৰকাশ পোৱা প্ৰতিবেদন অনুসৰি লাহোৰৰ গোপাল নগৰ আৰু নছিৰাবাদৰ ৱাল্টন বিমান বন্দৰৰ সমীপত সংঘটিত হৈছে এই ধাৰাবাহিক বিস্ফোৰণ।
ইফালে বিস্ফোৰণৰ পিছতেই অস্থায়ী ৰূপত বন্ধ কৰি দিয়া হৈছে লাহোৰ বিমান বন্দৰ। ড্ৰোনৰ জৰিয়তে এই বিস্ফোৰণ সংঘটিত কৰা বুলি খবৰ আহিছে। বিস্ফোৰণ হোৱা স্থানৰ নিচেই সমীপতে আছে পাকিস্তান সেনাৰ ইউনিট। এই সেনাৰ ঘাটিক লক্ষ্য কৰিয়েই বিস্ফোৰণ সংঘটিত কৰোৱা বুলি সন্দেহ প্ৰকাশ কৰিছে।
অৱশ্যে এই বিস্ফোৰণত কিমান ক্ষয়-ক্ষতি হৈছে তথা কোনে বিস্ফোৰণ সংঘটিত কৰিছে সেই তথ্য এতিয়ালৈ প্ৰকাশ পোৱা নাই।
উল্লেখ্য যে, যোৱা ২২ এপ্ৰিলত জম্মু-কাশ্মীৰৰ পেহেলগামত ইছলামিক সন্ত্ৰাসবাদীৰ আক্ৰমণত ২৬ গৰাকীকৈ ভাৰতীয় লোকৰ মৃত্যু হোৱা ঘটনাৰ প্ৰতিশোধ স্বৰূপে ৭ মে’ৰ পুৱতি নিশা ভাৰতীয় সেনাই পাকিস্তানৰ ৯টা স্থানত এয়াৰ ষ্ট্ৰাইক কৰে। এই এয়াৰ ষ্ট্ৰাইকত ১০০ৰো অধিক সন্ত্ৰাসবাদী নিহত হোৱা বুলি দাবী কৰা হৈছে।
ভাৰতীয় সেনাৰ এয়াৰ ষ্ট্ৰাইকৰ এদিন পিছতেই পাকিস্তানৰ অন্যতম ডাঙৰ চহৰ লাহোৰৰ বিভিন্ন প্ৰান্তত সংঘটিত ধাৰাবাহিক বিস্ফোৰণত এতিয়া আতংকিত হৈ পৰিছে দেশখনৰ সাধাৰণৰ জনতা।
