‘সপ্তাহত ৭০ ঘণ্টা কৰ্তব্য সম্পাদন কৰিবই লাগিব দেশৰ তৰুণ সমাজে।’ দেশত কর্মসংস্কৃতি ঘূৰাই অনাৰ স্বাৰ্থতেই এই পৰামৰ্শ দিছিল ইনফ’চিছৰ মুৰব্বী নাৰায়ণ মূৰ্তিয়ে। এতিয়া সেই নাৰায়ণ মূৰ্তিৰ পৰামৰ্শকেই অগ্ৰাহ্য কৰিছে ইনফ’চিছে।
ইনফ’চিছৰ মতে, এতিয়াৰে পৰা সপ্তাহত ৪৬ ঘণ্টা ১৫ মিনিটৰ অধিক সময় কাৰ্যালয়ত কাম কৰাৰ প্ৰয়োজন নাই।
সৰ্বভাৰতীয় এক সংবাদপত্ৰত প্ৰকাশিত এক প্ৰতিবেদন অনুসৰি, নিৰ্ধাৰিত সময়তকৈ যিসকল কৰ্মচাৰীয়ে অতিৰিক্ত সময় কাৰ্যালয়ত অতিবাহিত কৰে বা কাম কৰে, তেওঁলোককলৈ ইনফ’চিছৰ হিউমেন ৰিচ’ৰ্ছ দপ্তৰৰ পৰা একোটিকৈ মেইল পঠোৱা হৈছে। এই মেইলত কৰ্মচাৰীসকলৰ ‘কৰ্মজীৱন আৰু ব্যক্তিগত জীৱনৰ মাজত ভাৰসাম্য’ বজাই ৰখাত গুৰুত্ব আৰোপ কৰা হৈছে।
মেইলত আৰু কোৱা হৈছে- ‘কৰ্মচাৰীসকলে সপ্তাহত ৫ দিন কাৰ্যালয়ত কাম কৰিব। দৈনিক ৯ ঘণ্টা ১৫ মিনিটকৈ সপ্তাহত মুঠ ৪৬ ঘণ্টা ১৫ মিনিটৰ বেছি সময় কোনোৱে কাম কৰা উচিত নহয়।’
কেৱল কাৰ্যালয়তে নহয়, যদি কোনো কৰ্মচাৰীয়ে ঘৰৰ পৰাই কাৰ্য সম্পাদন কৰিছে তেন্তে তেওঁলোকৰ ক্ষেত্ৰতো এই নীতি প্ৰযোজ্য। কৰ্মচাৰীসকলৰ স্বাস্থ্যৰ বিষয়টো উল্লেখ কৰি মেইলত কোৱা হৈছে– ‘আপোনালোকৰ প্ৰতিশ্ৰুতিৰ বাবে আমি কৃতজ্ঞ। তথাপি আমি এইটোও বিশ্বাস কৰোঁ যে, আপোনাৰ সুস্থতা আৰু দীৰ্ঘম্যাদী কৰ্মজীৱনৰ সাফল্যৰ স্বাৰ্থত কৰ্মজীৱনৰ সৈতে ব্যক্তিগত জীৱনৰ ভাৰসাম্য বজাই ৰখাটো অতিকে গুৰুত্বপূৰ্ণ।’
উল্লেখ্য যে, পূৰ্বে এটি পডকাষ্টত নাৰায়ণ মূৰ্তিয়ে দাবী কৰি কৈছিল যে ভাৰতৰ কৰ্ম সংস্কৃতিত এক বৃহৎ পৰিবৰ্তনৰ প্ৰয়োজনীয়তা আহি পৰিছে। সপ্তাহত ৭০ ঘণ্টা কাম কৰাৰ দৰকাৰ তৰুণ কৰ্মচাৰী সকলে।
নাৰায়ণ মূৰ্তিৰ নিজৰ ভাষাত- ‘ভাৰতৰ কৰ্ম-উৎপাদনশীলতা বিশ্বৰ ভিতৰতে নিম্ন। মোৰ দৃষ্টিত তৰুণ সকলে অৱশ্যেই এইটো কোৱা উচিত, এয়া আমাৰ দেশ। আমি ৭০ ঘণ্টা কাম কৰিবলৈ আগ্ৰহী।’
নাৰায়ণ মূৰ্তিৰ এই বক্তব্যৰ পিছতেই সৃষ্টি হয় তুমুল বিতৰ্কৰ। তৎস্বত্তেও তেওঁ নিজৰ এই মত এৰা নাছিল আৰু পৰৱৰ্তী সময়তো এই মত প্ৰতিষ্ঠাৰ সপক্ষেই বক্তব্য দিয়া দেখা গৈছিল।
কিন্তু এতিয়া সেই নাৰায়ণ মূৰ্তিৰ পৰামৰ্শৰ বিপৰীত স্থিতিত নিজৰেই সংস্থা ইনফ’চিছ। দেশজুৰি এতিয়া চৰ্চাত ইনফ’চিছৰ এই নতুন সিদ্ধান্ত।
