২০২৪ বৰ্ষৰ অন্তিমটো ‘মন কি বাত’ প্ৰধানমন্ত্ৰী নৰেন্দ্ৰ মোদীৰ। এই অনুষ্ঠানতে প্ৰধানমন্ত্ৰী নৰেন্দ্ৰ মোদীয়ে আগন্তুক মহাকুম্ভ স্নান আৰু মেলাৰ বিষয়ে বিশেষ বাৰ্তা প্ৰদান কৰে। তেওঁ ১৩ জানুৱাৰীৰ মহাকুম্ভক ‘ঐক্যৰ মহাকুম্ভ’ বুলি উল্লেখ কৰে। তেওঁ দেশবাসীক এই মহান ধৰ্মীয় সমাৱেশত অংশগ্ৰহণ কৰিবলৈ আহ্বান জনায়।
মহাকুম্ভত স্নান কৰি ‘ঘৃণা’ আৰু ‘বিভাজন’ক ত্যাগ কৰাৰ বাৰ্তা প্ৰদান কৰে মোদীয়ে। তেওঁ কয়, ‘মহাকুম্ভৰ বাৰ্তা হ’ল সমগ্ৰ দেশ একত্ৰিত হ’ব লাগে। মহাকুম্ভৰ বিশেষত্ব কেৱল ইয়াৰ বিশালতাই নহয়, ইয়াৰ বৈচিত্ৰতাও।’
উল্লেখ্য যে প্ৰতি ৩ বছৰৰ মূৰে মূৰে কুম্ভ মেলাৰ আয়োজন কৰা হয় যদিও মহাকুম্ভৰ পবিত্ৰ স্নানৰ তিথি প্ৰতি ১২ বছৰৰ মূৰে মূৰে আহে। অহা বছৰ অৰ্থাৎ ২০২৫ চনৰ ১৩ জানুৱাৰীত মকৰ সংক্ৰান্তিৰ দিনা এই প্ৰয়াগৰাজত হ’ব স্নান।
এই মন কি বাতত অনুষ্ঠানতে প্ৰধানমন্ত্ৰী মোদীয়ে আগন্তুক গণতন্ত্ৰ দিৱস সন্দৰ্ভত মন্তব্য কৰা পৰিলক্ষিত হৈছে। উল্লেখ্য যে ২০২৫ চনৰ ২৬ জানুৱাৰীত ভাৰতে নিজৰ সংবিধান কাৰ্যকৰী হোৱাৰ ৭৫ বছৰ উদযাপন কৰিব।
এই সন্দৰ্ভত মোদীয়ে কয়, ‘আগন্তুক গণৰাজ্য দিৱসত আমি আমাৰ সংবিধান ৰূপায়ণৰ ৭৫ বছৰ উদযাপন কৰিম। ই আমাৰ সকলো দেশবাসীৰ বাবে অতি গৌৰৱৰ বিষয়। সময়ে সময়ে কঠিন পৰিস্থিতিৰ বিৰুদ্ধে যুঁজ দিয়াত সহায় কৰি আহিছে আমাৰ সংবিধানে। আৰু মই ব্যক্তিগতভাৱে য’ত উপনীত হ’লোঁ, তাৰ আঁৰতো সংবিধানৰ অৱদান আছে।’
উল্লেখ্য যে, বিৰোধী শিবিৰে সময়ে সময়ে প্ৰধানমন্ত্ৰী মন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰ তথা বিজেপিৰ বিৰুদ্ধে সংবিধান অপমান কৰাৰ অভিযোগ তুলিছে। অৱশ্যে প্ৰতিবাৰেই এই অভিযোগক নসাত কৰি আহিছে বিজেপিয়ে।
এন ডি এ চৰকাৰে কেনেকৈ সাংবিধানিক মূল্যবোধ আৰু ইয়াৰ ভাবমূর্তি ৰক্ষা কৰিছে সেই কথা আজি মন কি বাতত মোদীয়ে কয়৷ মূল বিৰোধী দল অৰ্থাত কংগ্ৰেছে ক্ষমতাত থাকিলেই সংবিধানৰ মূল্যবোধক ভেঙুচালি কৰিবলৈ চেষ্টা কৰা বুলিও অভিযোগ উত্থাপন কৰে মোদীয়ে।
