ৰণবীৰ এলাহাবাদিয়াৰ লগতে একাংশ ইউটিউবাৰে কৰা অশ্লীল মন্তব্যৰ পিছতেই কঠোৰ হৈ পৰিছে উচ্চতম ন্যায়ালয়। কেন্দ্ৰীয় চৰকাৰে ছ’চিয়েল মিডিয়া ইনফ্লুৱেঞ্চাৰসকলক নিয়ন্ত্ৰণ কৰাৰ বাবে আচৰণ বিধি আনিবলৈ সাজু হৈছে।
৫ৰ পৰা ৫০ লাখ অনুগামী থকা এই ইনফ্লুয়েঞ্চাৰসকলে এই ক’ড মানি চলিব লাগিব, যাতে ভৱিষ্যতে ইণ্ডিয়াজ গ’ট লেটেণ্টৰ দৰে অনুষ্ঠানে সমগ্ৰ দেশৰ মানুহৰ আৱেগক আঘাত নকৰে। ইয়াৰ উপৰি ইনফ্লুয়েঞ্চাৰসকলক কন্টেন্ট ৰেটিং দিয়াটোও বাধ্যতামূলক হ’ব।
ছ’চিয়েল মিডিয়া প্লেটফৰ্ম আৰু অ’টিটি কন্টেন্ট সন্দৰ্ভত চৰকাৰে বিভিন্ন পৰ্যায়ত পদক্ষেপ গ্ৰহণ কৰিছে। ইয়াৰ বাবে শিশুসকলক অশ্লীল বিষয়বস্তুৰ পৰা আঁতৰাই ৰাখিবলৈ নিয়মৰ খচৰা প্ৰস্তুত, অ’টিটি প্লেটফৰ্মৰ স্ব-নিয়ন্ত্ৰণ সংস্থাসমূহৰ বাবে পৰামৰ্শ আৰু ডিজিটেল ইণ্ডিয়া বিলৰ খচৰা প্ৰস্তুতৰ কাম অব্যাহত আছে।
ইফালে ইণ্ডিয়াজ গ’ট লেটেণ্টৰ বিতৰ্কই দেশবাসীৰ সন্মুখত ছ’চিয়েল মিডিয়াৰ আন এক কুৎসিত ছবি দাঙি ধৰিছে। যাৰ পৰিপ্ৰেক্ষিতত শেহতীয়াকৈ উচ্চতম ন্যায়ালয়ে এলাহাবাদিয়াৰ আবেদনৰ শুনানিৰ সময়ত তীব্ৰ সমালোচনা কৰে।
উচ্চতম ন্যায়ালয়ে দিয়া এই আচৰণ বিধি উলংঘা কৰিলে দেশত প্ৰযোজ্য থকা বৰ্তমানৰ অপৰাধমূলক আইন আৰু বিশেষ আইনসমূহৰ অধীনত ব্যৱস্থা গ্ৰহণ কৰা হ’ব। এই আইনত জৰিমনা আৰু শাস্তিৰ ব্যৱস্থা আছে।
বিগত মাহৰ ৩ জানুৱাৰীত তথ্য আৰু প্ৰযুক্তি মন্ত্ৰালয়ে ছ’চিয়েল মিডিয়াত মুকলিকৈ প্ৰচাৰিত অশ্লীল বিষয়বস্তুৰ পৰা ১৮ বছৰৰ তলৰ শিশুক আঁতৰাই ৰাখিবলৈ ডিজিটেল পাৰ্চনেল ডাটা প্ৰটেকচন এক্ট-২০২৩ৰ নিয়মৰ খচৰা প্ৰকাশ কৰিছিল। ইয়াত নাবালকসকলে ছ’চিয়েল মিডিয়াত একাউণ্ট খুলিবলৈ অভিভাৱকৰ সন্মতি বাধ্যতামূলক কৰা হৈছে। পৰামৰ্শ আৰু আপত্তিসমূহ বিবেচনা কৰাৰ পিছত অতি সোনকালে ইয়াক কাৰ্যকৰী কৰা হ’ব।
আনহাতে ছ’চিয়েল মিডিয়াত অশ্লীলতা বন্ধ কৰিবলৈ কেন্দ্ৰীয় চৰকাৰে বৰ্তমানৰ আই টি আইনখনৰ ঠাইত ডিজিটেল ইণ্ডিয়া বিল অনাৰ কামত ব্যস্ত হৈ পৰিছে।
