অলিম্পিকৰ স্বৰ্ণ পদক বিজয়ী নীৰজ চোপ্ৰাই ভাৰতীয় সেনাবাহিনীত ডাঙৰ দায়িত্ব লাভ কৰিছে। টেৰিটৰিয়েল আৰ্মীত লেফটেনেণ্ট কৰ্ণেল উপাধি দিয়া হৈছে নীৰজ চোপ্ৰাক।
বিশ্বৰ অন্যতম শ্ৰেষ্ঠ জেভেলিন নিক্ষেপকাৰী হৈছে নীৰজ চোপ্ৰা। ২০২১ চনৰ টকিঅ’ অলিম্পিকত ভাৰতৰ হৈ জেভেলিন নিক্ষেপত স্বৰ্ণ পদক লাভ কৰিবলৈ সক্ষম হোৱা নীৰজে এতিয়া ভাৰতীয় সেনাবাহিনীত লেফটেনেণ্ট কৰ্ণেল পদক লাভ কৰিছে।
ভাৰতৰ টেৰিটৰিয়েল আৰ্মী ৰেগুলেচন, ১৯৪৮ৰ পেৰা-৩১ৰ অধীনত নীৰজ চোপ্ৰাক অন্তৰ্ভুক্ত কৰা হৈছে। ভাৰতৰ ৰাষ্ট্ৰপতি দ্ৰৌপদী মুৰ্মুৱে তেওঁক লেফটেনেণ্ট কৰ্ণেল পদবী প্ৰদান কৰিছে। ইয়াৰ পূৰ্বে নীৰজ ৰাজপুতনা ৰাইফলছত চুবেদাৰ হিচাপে পোষ্ট কৰা হৈছিল। নীৰজে ২০১৬ চনত নৈব চুবেদাৰ হিচাপে ভাৰতীয় সেনাবাহিনীত যোগদান কৰিছিল।
টকিঅ’ অলিম্পিকত জেভলিন নিক্ষেপত স্বৰ্ণ পদক লাভ কৰি ইতিহাসৰ সৃষ্টি কৰিছিল নীৰজ চোপ্ৰাই। তেওঁ দেশৰ হৈ ব্যক্তিগত স্বৰ্ণ পদক লাভ কৰা প্ৰথমজন ট্ৰেক এণ্ড ফিল্ড এথলীট হিচাপে পৰিগণিত হয়। দ্বিতীয়টো প্ৰচেষ্টাত ৮৭.৫৮ মিটাৰ দূৰত্বৰে প্ৰথম স্থান দখল কৰি স্বৰ্ণ জয় কৰিছিল নীৰজে। টকিঅ’ অলিম্পিকত ভাৰতৰ হৈ প্ৰথমটো সোণৰ পদক লাভ কৰে।
য’ত নীৰজ চোপ্ৰাই টকিঅ’ অলিম্পিকত স্বৰ্ণ পদক লাভ কৰে। একে সময়তে ২০২৪ চনৰ পেৰিছ অলিম্পিকতো ভাৰতৰ হৈ ৰূপৰ পদক কঢ়িয়াই আনিছিল নীৰজে। অলিম্পিকত একেৰাহে দুটাকৈ পদক লাভ কৰি নীৰজ চোপ্ৰাই বহু বিজ্ঞাপনৰ অফাৰো লাভ কৰিছে।
২০২৫ চনত নীৰজে পেছাদাৰী টেনিছ খেলুৱৈ হিমানী মোৰৰ সৈতে বিবাহপাশত আবদ্ধ হয়।নীৰজৰ পূৰ্বেও বহু খেলুৱৈ টেৰিটৰিয়েল আৰ্মীৰ অংশ হৈছিল। ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনীও টেৰিটৰিয়েল আৰ্মীত আছে।
