নেপাল চৰকাৰে এক ডাঙৰ পদক্ষেপ গ্ৰহণ কৰি ফেচবুক, ইনষ্টাগ্ৰাম, ইউটিউবকে ধৰি মুঠ ২৬টা ছ’চিয়েল মিডিয়া এপ নিষিদ্ধ কৰে। নেপালৰ মানুহে আৰু ব্যৱহাৰ কৰিব নোৱাৰিব এইসমূহ এপ।
আচলতে চৰকাৰে এই কোম্পানীবোৰক নেপালত পঞ্জীয়ন কৰিবলৈ কৈছিল। সময়সীমাৰ ভিতৰত পঞ্জীয়ন নকৰা সকলো কোম্পানীৰ বিৰুদ্ধে ব্যৱস্থা গ্ৰহণ কৰি নিষেধাজ্ঞা আৰোপ কৰা হৈছে। কিন্তু বহুতে এই সিদ্ধান্তক সমালোচনা কৰি মুক্ত বাক্যৰ ওপৰত নিষেধাজ্ঞা আখ্যা দিছে।
নেপালৰ যোগাযোগ আৰু তথ্য মন্ত্ৰী পৃথ্বী চুব্বা গুৰুঙে কয় যে, চৰকাৰে অবিৰতভাৱে ২৬টা সৰ্বাধিক ব্যৱহৃত কোম্পানীলৈ জাননী প্ৰেৰণ কৰি দেশত নিজৰ কোম্পানী পঞ্জীয়ন কৰিবলৈ কৈছিল, কিন্তু তেওঁলোকে তেনে কৰা নাছিল। এই কাৰণতে তাৎক্ষণিকভাৱে নিষেধাজ্ঞা আৰোপ কৰা হৈছে।
টেলিকম কৰ্তৃপক্ষক এই ছাইটসমূহ নেপালত পঞ্জীয়ন নকৰালৈকে ব্লক কৰি ৰাখিবলৈ নিৰ্দেশ দিছে মন্ত্ৰালয়ে। খবৰ অনুসৰি, এই কোম্পানীসমূহক পঞ্জীয়নৰ বাবে ২৮ আগষ্টলৈকে সময় দিয়া হৈছিল। সময়সীমাৰ এসপ্তাহৰ পাছত চৰকাৰে নিষেধাজ্ঞা আৰোপ কৰিছে।
গুৰুঙে কয় যে নেপালত টিকটক, ভাইবাৰকে ধৰি ৫টা কোম্পানীয়ে পঞ্জীয়ন কৰিছে। ইয়াৰ বাবে তেওঁলোকৰ বিৰুদ্ধে কোনো ব্যৱস্থা গ্ৰহণ কৰা নহ’ব। উল্লেখ্য যে নেপালেও ২০২৩ চনত টিকটক নিষিদ্ধ কৰিছিল।পিছলৈ যেতিয়া কোম্পানীটোৱে পঞ্জীয়ন কৰিবলৈ সন্মত হৈছিল, তেতিয়া ২০২৪ চনত এই নিষেধাজ্ঞা উঠাই লোৱা হৈছিল।
ছ’চিয়েল মিডিয়া প্লেটফৰ্ম নিষিদ্ধ কৰাৰ বাবে নেপাল চৰকাৰক সমালোচনা কৰা হৈছে। সমালোচকসকলে কয় যে, বিৰোধীৰ কণ্ঠ দমন কৰিবলৈ চৰকাৰে পঞ্জীয়ন বাধ্যতামূলক কৰিছিল। ইয়াৰ বাহিৰেও বহু চৰ্ত ইমানেই কঠোৰ যে সেইবোৰ মানি চলাটো কঠিন। একে সময়তে একাংশই কয় যে ইয়াৰ ফলত নেপালৰ ভাবমূর্তিত বেয়া প্রভাৱ পৰিব৷
