মিচেল ছাণ্টনাৰৰ যাদুকৰী স্পিন আৰু অধিনায়ক টম লেথামে খেলা ইনিংছৰ বাবেই পুনেত অনুষ্ঠিত হোৱা দ্বিতীয়খন টেষ্টত নিউজিলেণ্ডে ভাৰতক ১১৩ ৰানত পৰাস্ত কৰে।
আজিৰ জয়ৰ লগে লগে নিউজিলেণ্ডে তিনিখন মেচৰ টেষ্ট শৃংখলাটো ২-০ত অগ্ৰগতি লাভ কৰাৰ লগতে শৃংখলাটোও দখল কৰে।
উল্লেখ্য যে, ভাৰতৰ ভূমিত প্ৰথমবাৰৰ বাবে নিউজিলেণ্ড দলে টেষ্ট শৃংখলা জয় হ’বলৈ সক্ষম হৈছে।
ইফালে ভাৰতে নিজৰ ভূমিত ৪৩৩২ দিনৰ অন্তত পৰাস্ত হৈছে টেষ্ট শৃংখলা। ইয়াৰ পূৰ্বে ২০১২ চনত ইংলেণ্ডে ভাৰতৰ মাটিত টেষ্ট শৃংখলাত জয়লাভ কৰিছিল। সেইসময়ত ভাৰতৰ অধিনায়ক আছিল ধোনী।
এতিয়া ১২ বছৰৰ পাছত পুনৰ এবাৰ ঘৰৰ মাটিত টেষ্ট শৃংখলাত পৰাস্ত হৈছে টিম ইণ্ডিয়া। ইফালে একেৰাহে ১৮টা টেষ্ট শৃংখলাত জয়ী হৈ অহা এই ধাৰাও স্তব্ধ হয় ভাৰতৰ।
উল্লেখ্য যে, তিনিখন মেচৰ শৃংখলাৰ দ্বিতীয়খন মেচত নিউজিলেণ্ডে টছত জয়লাভ কৰি প্ৰথমে বেটিং কৰাৰ সিদ্ধান্ত লয়। প্ৰথম ইনিংছত আলহী দলটোৱে ২৫৯ ৰান সংগ্ৰহ কৰে। ইয়াৰ পিছত টিম ইণ্ডিয়াই প্ৰথম ইনিংছত মাত্ৰ ১৫৬ ৰানহে কৰিব পাৰিছিল। এইদৰে আলহী দলটোৱে ১০৩ ৰানৰ বিশাল অগ্ৰগতি লাভ কৰে।
দ্বিতীয় ইনিংছত নিউজিলেণ্ডে ২৫৫ ৰান সংগ্ৰহ কৰি ভাৰতক ৩৫৯ ৰানৰ লক্ষ্য নিৰ্ধাৰণ কৰে। ইয়াৰ প্ৰতিক্ৰিয়া স্বৰূপে আয়োজক দলটোৱে মাত্ৰ ২৪৫ ৰানহে কৰিব পাৰিছিল।
অৱশ্যে এটা সময়ত ভাৰতৰ স্ক’ৰ এটা উইকেটত ৯৬ ৰান আছিল যদিও মিডল অৰ্ডাৰ সম্পূৰ্ণৰূপে ফ্লপ হিচাপে পৰিগণিত হয়।
নিউজিলেণ্ডৰ এই ঐতিহাসিক জয়ৰ নায়ক আছিল মিচেল ছাণ্টনাৰ। এই মেচখনত ছান্টনাৰে মুঠ ১৩টা উইকেট দখল কৰে। প্ৰথম ইনিংছত ছান্টনাৰে ৭ জন ভাৰতীয় বেটছমেনক পেভিলিয়নলৈ প্ৰেৰণ কৰে। দ্বিতীয় ইনিংছত তেওঁ ৬টা উইকেট লাভ কৰে।
৩৫৯ ৰানৰ লক্ষ্য অতিক্ৰম কৰিবলৈ যোৱা টিম ইণ্ডিয়াৰ হৈ যশস্বী জয়ছৱালে ৬৫ বলত ৭৭ ৰানৰ ইনিংছ খেলিছিল। তেওঁৰ বেটৰ পৰা ৯টা চাৰি আৰু ৩টা ছয়। ইয়াৰ উপৰি ৰোহিত শৰ্মা ০৮, শুভমন গিল ২৩, বিৰাট কোহলী ১৭, ঋষভ পন্ত ০, ৱাশ্বিংটন সুন্দৰ ২১, ছৰফৰাজ খান ৯ আৰু ৰবিচন্দ্ৰন অশ্বিন ১৮ ৰান সংগ্ৰহ কৰি আউট হয়। ৰবীন্দ্ৰ জাদেজাই ৪২ ৰানৰ ইনিংছ খেলিছিল।
