জম্মু-কাশ্মীৰৰ পেহেলগামত ইছলামিক সন্ত্ৰাসবাদীয়ে চলোৱা নৃশংস আক্ৰমণৰ তদন্ত চলাব ৰাষ্ট্ৰীয় অনুসন্ধান সংস্থা চমুকৈ এন আই এয়ে। পেহেলগাম সন্ত্ৰাসবাদী আক্ৰমণৰ পিছৰে পৰা ঘটনাস্থলত ফৰেনছিক দল আৰু তদন্তকাৰী দলকে ধৰি এন আই এৰ দল উপস্থিত আছে।
ভাৰত চৰকাৰৰ গৃহ মন্ত্ৰালয়ে এই নিৰ্দেশনা জাৰি কৰাৰ পিছত ঘটনা সন্দৰ্ভত এন আই এয়ে আনুষ্ঠানিকভাৱে এটা গোচৰ পঞ্জীয়ন কৰিছে।
প্ৰমাণ সংগ্ৰহত ব্যস্ত এন আই এ
এটা আগশাৰীৰ সংবাদ সংস্থাই প্ৰকাশ কৰা প্ৰতিবেদন অনুসৰি, পেহেলগাম সন্ত্ৰাসবাদী আক্ৰমণৰ বলি হোৱা লোকসকলক সাক্ষাৎ কৰি প্ৰমাণ সংগ্ৰহত ব্যস্ত হৈ পৰিছে এনআইএৰ দল। এ আই এৰ বিশেষ দলসমূহে সন্ত্ৰাসবাদী আক্ৰমণৰ পৰা প্ৰাণ ৰক্ষা পৰা পৰ্যটককে ধৰি প্ৰত্যক্ষদৰ্শীৰ সৈতে যোগাযোগ কৰিবলৈ আৰম্ভ কৰিছে।
একে সময়তে জম্মু-কাশ্মীৰ আৰক্ষী, সেনা আৰু অৰ্ধসামৰিক বাহিনীয়ে মানৱবিহীন বিমান (ইউ এ ভি) আৰু ড্ৰ’নৰ সহায়ত সন্ত্ৰাসবাদীৰ সন্ধানত ব্যাপক অভিযান অব্যাহত ৰাখিছে।
বিষয়াসকলে জনোৱা মতে, মঙলবাৰৰ পৰা দলসমূহে প্ৰত্যক্ষদৰ্শীৰ সৈতে যোগাযোগ কৰিবলৈ আৰম্ভ কৰে। উল্লেখ্য যে, আৰক্ষী, সেনা আৰু চি আৰ পি এফৰ নিৰন্তৰ অভিযানৰ বাবে যোৱা কিছুদিনৰ পৰা দক্ষিণ আৰু উত্তৰ কাশ্মীৰত কিছু এনকাউণ্টাৰ সংঘটিত হৈছে আৰু শুকুৰবাৰে বান্দিপোৰা জিলাত লস্কৰৰ শীৰ্ষ নেতা আলতাফ লালি নিহত হয়।
উল্লেখ্য যে, ২২ এপ্ৰিলত পেহেলগামত সংঘটিত সন্ত্ৰাসবাদী আক্ৰমণত ২৬ জন লোকে প্ৰাণ হেৰুৱাইছিল। পাঁচজনৰ পৰা সাতজন সন্ত্ৰাসবাদীয়ে এই নৃশংস কাণ্ড সংঘটিত কৰাৰ সন্দেহ প্ৰকাশ কৰা হৈছে।
