মাত্ৰ ১৮ বছৰ বয়সতে অনন্য কৃতিত্ব অৰ্জন কৰিলে নেপালী যুৱক নিমা ৰিঞ্জি শ্বেৰ্পাই। বুধবাৰে পুৱা তিব্বতৰ শিশাপাংমা শৃংগ (৮,০২৭ মিটাৰ) আৰোহণ কৰি তেওঁ বিশ্বৰ ১৪টা সৰ্বোচ্চ শৃংগ জয় কৰাৰ অভিলেখ গঢ়িবলৈ সক্ষম হয়।
এই ১৪টা পৰ্বতৰ শৃংগ হিমালয় আৰু কাৰাকোৰাম পৰ্বতমালাত অৱস্থিত যিয়ে নেপাল, চীন, ভাৰত আৰু পাকিস্তানৰ ভূখণ্ডক সামৰি লৈছে। এই উচ্চতা জয় কৰাটো পৰ্বতাৰোহণৰ জগতখনৰ অন্যতম সন্মানীয় আৰু প্ৰত্যাহ্বানমূলক বুলি গণ্য কৰা হয়।
গিনিজ ৱৰ্ল্ড ৰেকৰ্ডছৰ মতে, এই কৃতিত্ব পূৰ্বে আন এগৰাকী নেপালী পৰ্বতাৰোহী মিংমা ডেভিদ শ্বেৰ্পাৰ নামত আছিল। ২০১৯ চনৰ ২৯ অক্টোবৰত মিংমাই ৩০ বছৰ ১৬৬ দিনত এইখিনি অৰ্জন কৰিছিল।
অৱশ্যে বয়সৰ ফালৰ পৰাই নহয়, সময়ৰ ক্ষেত্ৰতো নিমা ৰিঞ্জিয়ে মিংমাক চেৰ পেলাইছিল। তেওঁ এই অভিযান মাত্ৰ ২ বছৰ ৪০ দিনত সম্পূৰ্ণ কৰিছিল, আনহাতে মিংমাই ৯ বছৰ ১৫৯ দিন সময় লৈছিল।
নিমা ৰিঞ্জিৰ এই সফলতাৰ আঁৰত গাইড হিচাপে আছিল ইটালীৰ পৰ্বতাৰোহী ৰেইনহল্ড মেছনাৰ। ১৯৮৬ চনত মেছনাৰে ৮০০০ মিটাৰৰ ওপৰৰ ১৪টা শৃংগ জয় কৰা প্ৰথমজন ব্যক্তি হিচাপে পৰিগণিত হয়। তেতিয়াৰ পৰা মাত্ৰ অৰ্ধশতাধিক পৰ্বতাৰোহীয়েহে এই অভিলেখ গঢ়িবলৈ সক্ষম হৈছে আৰু বহুতে এই প্ৰচেষ্টাত প্ৰাণ হেৰুৱাইছে।
নিমা ৰিঞ্জি শ্বেৰ্পাই ২০২২ চনত নেপালৰ চেভেন ছামিটছ ট্ৰেক আৰু ফৰ্টি পিকছ এক্সপেডিচনৰ বাবে এই দুঃসাহসিক অভিযান আৰম্ভ কৰিছিল। তেওঁৰ প্ৰথম গন্তব্যস্থান আছিল নেপালৰ মাউণ্ট মানছলু, যিটো ৮,১৬৩ মিটাৰ উচ্চতা। ২০২৩ চনত তেওঁ এভাৰেষ্টকে ধৰি আৰু ৯টা শৃংগ জয় কৰে।
এইবাৰ নিমা ৰিঞ্জীয়ে অন্নপূৰ্ণা অভিযানৰ জৰিয়তে পৰ্বতাৰোহণৰ কাৰ্যসূচী আৰম্ভ কৰিছিল। বিশেষ কথাটো হ’ল তেওঁ অক্সিজেন চিলিণ্ডাৰ নোহোৱাকৈয়ে ৮,০৯১ মিটাৰ উচ্চতাৰ অন্নপূৰ্ণা শৃংগত আৰোহণ কৰিছিল। তাৰ পিছত ৪ মে’ত মাকালু আৰু ৮ জুনত কাঞ্চনজংঘা জয় কৰিছিল।
চীনৰ পৰা তিব্বতৰ শিশাপাংমা শৃংগ আৰোহণৰ অনুমতি লাভ কৰাৰ পাছত নিমাই যোৱা মাহহ অন্তিমটো অভিযান আৰম্ভ কৰে। এই অভিযান সফলতাৰে সমাপ্ত হোৱাত তেওঁ এক নতুন ইতিহাস ৰচিবলৈ সক্ষম হয়।
নিমা ৰিঞ্জি শ্বেৰপাই কেৱল ১৪টা পৰ্বত জয় কৰাৰ লগতে তেওঁৰ নামত আছে আন কেইবাটাও অভিলেখ। পৃথিৱীৰ আটাইতকৈ কম বয়সীয়া পৰ্বতাৰোহী হিচাপে তেওঁ নগা, কাঞ্চনজংঘা, ১নং গছৰব্ৰুম ১ আৰু ২ নং পৰ্বত জয় কৰিছে।
ইয়াৰ উপৰি মাউণ্ট এভাৰেষ্ট আৰু মাউণ্ট লোট্চে একেলগে জয় কৰা আটাইতকৈ কম বয়সীয়া হোৱাৰ অভিলেখো তেওঁৰ নামত আছে।
