পঞ্জাব নেশ্যনেল বেংক কেলেংকাৰিৰ সৈতে জড়িত গোচৰত নীৰৱ মোদীৰ ভাতৃ নেহাল মোদীক আমেৰিকাৰ কৰ্তৃপক্ষই গ্ৰেপ্তাৰ কৰিছে। এই গ্ৰেপ্তাৰৰ বিষয়ে আমেৰিকাৰ ন্যায় বিভাগে ভাৰতীয় সংস্থাক অৱগত কৰিছে।
ভাৰতৰ প্ৰৱৰ্তন সঞ্চালকালয় আৰু কেন্দ্ৰীয় তদন্তকাৰী সংস্থাই যৌথভাৱে দিয়া প্ৰত্যাৰ্পণৰ অনুৰোধৰ ভিত্তিত গ্ৰেপ্তাৰ কৰা হৈছে নেহাল মোদীক।
আমেৰিকাৰ বিচাৰ বিভাগে দাখিল কৰা অভিযোগ অনুসৰি ভাৰতত নেহাল মোদীৰ বিৰুদ্ধে দুটা ডাঙৰ অভিযোগত প্ৰত্যাৰ্পণ প্ৰক্ৰিয়া চলি আছে। তেওঁৰ বিৰুদ্ধে ধন সৰবৰাহৰ অভিযোগ। নেহাল মোদীৰ বিৰুদ্ধে ভাৰতীয় দণ্ডবিধিৰ ১২০-বি আৰু ২০১ ধাৰাত অপৰাধমূলক ষড়যন্ত্ৰ আৰু প্ৰমাণ ধ্বংস কৰাৰ অভিযোগো উত্থাপন হৈছে।
উল্লেখ্য যে, ভাতৃ নীৰৱ মোদীৰ সহায়ত কেলেংকাৰিৰ পৰা উপাৰ্জন কৰা হাজাৰ হাজাৰ কোটি টকাৰ ক’লা ধন লুণ্ঠনৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰাৰ অভিযোগ উত্থাপন হৈছে নেহাল মোদীৰ বিৰুদ্ধে। তদন্তত প্ৰকাশ পাইছে যে নেহালে শ্বেল কোম্পানী আৰু বহিঃৰাষ্ট্ৰত বিভিন্ন লেনদেনৰ জৰিয়তে এই ধন লুকুৱাই ৰাখিছিল।
জানিব পৰা অনুসৰি, নেহাল মোদীৰ প্ৰত্যৰ্পণ গোচৰৰ পৰৱৰ্তী শুনানি অহা ১৭ জুলাইত অনুষ্ঠিত হ’ব।
