সংসদে গৃহীত কৰা ৱাকফ সংশোধনী আইন ২০২৫ সন্দৰ্ভত উচ্চতম ন্যায়ালয়ত শুনানি চলি আছে। এই বিষয়টোক লৈ গৰম হৈ আছে দেশৰ ৰাজনীতি। ৱাকফ সম্পৰ্কীয় আইন প্ৰণয়ন হোৱাৰ পিছতো ইয়াক কাৰ্যকৰী কৰিব পৰা নাই।
এই সন্দৰ্ভত বিজেপি সাংসদ নিশিকান্ত ডুবেই মুখ্য ন্যায়াধীশ সঞ্জীৱ খান্নাৰ ওপৰত ক্ষোভ প্ৰকাশ কৰিছে। দেশত সংঘটিত হোৱা গৃহযুদ্ধৰ বাবে সঞ্জীৱ খান্না দায়ী বুলিও তেওঁ কয়।
শনিবাৰে বিজেপি নেতা নিশিকান্ত ডুবেই অভিযোগ উত্থাপন কৰে যে উচ্চতম ন্যায়ালয়ে দেশত ধৰ্মযুদ্ধৰ উচটনি দিয়াৰ বাবে দায়বদ্ধ। যদি উচ্চতম ন্যায়ালয়ে আইন বনাব লাগে তেন্তে সংসদ ভৱন বন্ধ কৰিব লাগে।
সংবাদ মাধ্যমৰ সৈতে হোৱা এক সাক্ষাৎকাৰত ডুবেই কয়, ‘উচ্চতম ন্যায়ালয়ৰ এটাই উদ্দেশ্য আছে। মোক মুখখন দেখুৱাওক, মই আপোনাক আইন দেখুৱাম।’
উচ্চতম ন্যায়ালয়ে নিজৰ সীমাৰ বাহিৰলৈ যোৱা বুলি উল্লেখ কৰি সাংসদগৰাকীয়ে কয় যে যদি আমি সকলো কামৰ বাবে উচ্চতম ন্যায়ালয়লৈ যাবলগীয়া হয়, তেন্তে সংসদ আৰু ৰাজ্যিক বিধানসভাসমূহ বন্ধ কৰি দিব লাগে।
বিজেপিৰ সাংসদ ডুবেই কয় যে এই দেশত সংঘটিত হোৱা সকলো গৃহযুদ্ধৰ বাবে ভাৰতৰ মুখ্য ন্যায়াধীশ সঞ্জীৱ খান্না দায়ী।
ডুবেই লগতে আৰু কয়, ‘আপুনি নিযুক্তি কৰ্তৃপক্ষক কেনেকৈ নিৰ্দেশ দিব পাৰে? ৰাষ্ট্ৰপতিয়ে ভাৰতৰ মুখ্য ন্যায়াধীশক নিযুক্তি দিয়ে। সংসদে এই দেশৰ আইন প্ৰণয়ন কৰে। আপুনি সেই সংসদক নিৰ্দেশ দিবনে? আপুনি কেনেকৈ নতুন আইন প্ৰণয়ন কৰিলে? কোনখন আইনত লিখা আছে যে ৰাষ্ট্ৰপতিয়ে তিনি মাহৰ ভিতৰত সিদ্ধান্ত ল’ব লাগিব? ইয়াৰ অৰ্থ হ’ল আপুনি এই দেশক অৰাজকতাৰ দিশে লৈ যাব বিচাৰে। সংসদত এই সন্দৰ্ভত বিশদ আলোচনা হ’ব।’
