মণিপুৰত চলি থকা হিংসাত্মক ঘটনাক লৈ উদ্বেগ প্ৰকাশ কৰি নেশ্যনেল পিপলছ পাৰ্টী চমুকৈ এন পি পিয়ে বিজেপি নেতৃত্বাধীন চৰকাৰখনৰ প্ৰতি সমৰ্থন প্ৰত্যাহাৰ কৰাৰ কথা ঘোষণা কৰিছে। দেওবাৰে এই ঘোষণা কৰে কনৰাড চাংমাই।
শেহতীয়াকৈ তেওঁ আজি শ্বিলঙত সমৰ্থন প্ৰত্যাহাৰ সন্দৰ্ভত আন এক ডাঙৰ মন্তব্য কৰিছে। তেওঁ কয় যে যদিহে মণিপুৰ চৰকাৰৰ নেতৃত্ব সলনি হয় তেন্তে এন পি পিয়ে পুনৰ বিজেপি চৰকাৰক সমৰ্থন জনাব।
উল্লেখ্য যে, এন বীৰেণ সিং নেতৃত্বাধীন চৰকাৰখনে মণিপুৰৰ সাম্প্ৰতিক পৰিস্থিতি নিয়ন্ত্ৰণত সম্পূৰ্ণ বিফল হোৱা বুলি অভিযোগ তুলি দেওবাৰে এন পি পিৰ মুৰব্বী তথা মেঘালয়ৰ মুখ্যমন্ত্ৰী কনৰাড চাংমাই বিজেপিৰ ৰাষ্ট্ৰীয় সভাপতি জে পি নাড্ডালৈ পত্ৰ প্ৰেৰণ কৰি সমৰ্থন প্ৰত্যাহাৰৰ কথা জনায়।
‘বিগত কিছু দিনৰ পৰা মণিপুৰৰ অৱস্থা আৰু অধিক শোচনীয় হৈছে আৰু বহুতে নিজৰ প্ৰাণ হেৰুৱাইছে। ৰাজ্যৰ জনসাধৰণে অতি দুখ-কষ্টৰে জীৱন অতিবাহিত কৰিছে’, পত্ৰযোগে এই কথা উল্লেখ কৰে।
চাংমাই লগতে কয়, ‘বৰ্তমানৰ পৰিস্থিতিৰ প্ৰতি লক্ষ্য ৰাখি মণিপুৰৰ বীৰেণ সিং নেতৃত্বাধীন চৰকাৰৰ প্ৰতি তাৎক্ষণিকভাৱে কাৰ্যকৰী হোৱাকৈ সমৰ্থন প্ৰত্যাহাৰ কৰাৰ সিদ্ধান্ত গ্ৰহণ কৰা হৈছে।’
উল্লেখ্য যে, ৬০ জনীয়া সদস্যৰে গঠিত মণিপুৰ বিধানসভাত কনৰাড চাংমা নেতৃত্বাধীন এন পি পি দলৰ ৭ গৰাকী বিধায়ক আছে। অৱশ্যে এন পি পি দলৰ সমৰ্থন প্ৰত্যাহাৰে মণিপুৰ চৰকাৰৰ কোনো ক্ষতি বা বিপদ নহয়।
