ওড়িশাৰ গোপালপুৰত এক ভয়ানক ঘটনাৰ সন্মুখীন হৈছে এহাল যুৱক-যুৱতী। গোপালপুৰ বিলত এগৰাকী যুৱতীৰ সৈতে জঘন্য কাণ্ড সংঘটিত কৰাৰ অভিযোগ। কেৱল সেয়াই নহয়, পুৰুষ বন্ধুকো মাৰপিট কৰাৰ অভিযোগ উত্থাপন হৈছে।
জানিব পৰা মতে, দেওবাৰে ওড়িশাৰ ৰাজা মহোৎসৱত অংশ ল’বলৈ তাই এজন পুৰুষ বন্ধুৰ সৈতে গোপালপুৰলৈ গৈছিল। ২০ বছৰীয়া যুৱতীগৰাকী আৰু তেওঁৰ বন্ধুৱে উৎসৱৰ মূল অনুষ্ঠানৰ পিছত বিলৰ নিৰ্জন অংশত ফুৰিবলৈ গৈছিল।
অভিযোগ অনুসৰি, সেই ঠাইলৈ আহি এদল অচিনাকি যুৱকে তেওঁলোকক খেদি পঠিয়ায়। সেই গ্ৰুপটোত ১০ জনকৈ লোক আছিল। তেওঁলোকে দুয়োকে অত্যাচাৰ কৰিবলৈ আৰম্ভ কৰে। যুৱতীগৰাকীৰ বন্ধুৱে তেওঁলোকক বাধা দিবলৈ চেষ্টা কৰাত এই ১০ জন যুৱকে যুৱতীগৰাকীৰ নিৰ্মম কাণ্ড সংঘটিত কৰে।
বেৰহামপুৰৰ আৰক্ষী অধীক্ষক বিবেক সৰৱণাই জানিবলৈ দিয়া মতে, এই কাণ্ডত ইতিমধ্যে এফআইআৰ ৰুজু হৈছে। যুৱতীগৰাকী আৰু তেওঁৰ বন্ধুৰ অভিযোগৰ ভিত্তিত ৭জন সন্দেহযুক্ত লোকক গ্ৰেপ্তাৰ কৰা হৈছে। পলাতক তিনিজন লোকৰ সন্ধান বৰ্তমান অব্যাহত আছে। আৰক্ষীয়ে সন্দেহ কৰিছে যে অভিযুক্তসকল স্থানীয় বাসিন্দা নহয়, পৰ্যটকহে। আৰক্ষী অধীক্ষকগৰাকীয়ে কয় যে আটকাধীন লোকসকলক জেৰা কৰি বাকীসকলৰ সন্ধান উলিয়াবলৈ চেষ্টা চলোৱা হৈছে। একে সময়তে সৰৱণাই কয় যে, অভিযুক্তক গ্ৰেপ্তাৰ কৰিবলৈ বিশেষ দল গঠন কৰা হৈছে। অতি সোনকালে দোষীক গ্ৰেপ্তাৰ কৰা হ’ব।
আনহাতে, ভুক্তভোগী যুৱতীগৰাকী আৰু তেওঁৰ বন্ধুক এম কে চি জি মেডিকেলত ভৰ্তি কৰোৱা হৈছে। জানিব পৰা মতে, ভুক্তভোগীৰ শাৰীৰিক পৰীক্ষা কৰা হ’ব। এই ঘটনাই পৰ্যটকৰ মাজত আতংক বিয়পি পৰিছে। কাৰণ পুৰীৰ লগতে ওড়িশাৰ এই সাগৰীয় বিলখন পৰ্যটকৰ মাজত অতি জনপ্ৰিয়। তাত এনে ঘটনা সংঘটিত হোৱাটো সঁচাকৈয়ে আংশকাৰ কাৰণ।
