ওড়িশাৰ ময়ুৰভঞ্জ জিলাৰ পৰা পোহৰলৈ আহিছে এক হৃদয় বিদাৰক ঘটনা। চাকৰিৰ প্ৰলোভন দি এগৰাকী যুৱতীক অপহৰণ কৰি অপকৰ্ম সংঘটিত কৰে। এই ঘটনা সংঘটিত হৈছে উডালা থানা এলেকাত, য’ত ৫জনকৈ অভিযুক্তই চলন্ত ভেনত এগৰাকী যুৱতীৰ এই জঘন্য কাণ্ড সংঘটিত কৰে।
তথ্য অনুসৰি, ওড়িশাৰ মৌৰভঞ্জ জিলাৰ অন্তৰ্গত অঞ্চল বাংগীৰিপোশী থানা এলেকাৰ বাসিন্দা। আৰক্ষীক দিয়া এজাহাৰত তেওঁ কয় যে, দুজন অচিনাকি যুৱকে তেওঁৰ ঘৰলৈ আহি তেওঁক ব্যক্তিগত কোম্পানীত চাকৰি দিবলৈ প্ৰলোভিত কৰিছিল। তাৰপিছত যুৱতীগৰাকীক আশ্বস্ত কৰি এখন ভেনত উঠাই লৈ যায়।
বাটত আৰু তিনিজন যুৱকে গাড়ীখনত উঠে। তাৰ পিছত গাড়ীখনে প্ৰায় ৮০ কিলোমিটাৰ অতিক্ৰম কৰি উদালা-বালাসোৰ ৰাজ্যিক ঘাইপথৰ এটা নিৰ্জন অঞ্চলত উপস্থিত হয়। তাতেই ৫ অভিযুক্তই একেলগে গাড়ীত থকা যুৱতীগৰাকীৰ সৈতে অপকৰ্ম সংঘটিত কৰে। ইয়াৰ পিছতে যুৱতীগৰাকীক চলন্ত গাড়ীৰ পৰা ঠেলি পলায়ন কৰে অভিযুক্তই।
ঘটনাৰ পাছতে স্থানীয় একাংশ লোকে পথৰ দাঁতিত যুৱতীগৰাকীক অচেতন অৱস্থাত উদ্ধাৰ কৰে। ইয়াৰ পিছতে ভুক্তভোগীৰ পৰিয়ালক খবৰ দিয়া হয় আৰু তেওঁক উদলা থানালৈ লৈ যায় আৰু তাতেই সমগ্ৰ বিষয়টোৰ ওপৰত এজাহাৰ দাখিল কৰে। লগে লগে আৰক্ষীয়ে এটা গোচৰ ৰুজু কৰি তদন্ত আৰম্ভ কৰে।
এই গোচৰত ইতিমধ্যে দুজন লোকক আটক কৰিছে আৰক্ষীয়ে।বৰ্তমান আৰক্ষীয়ে গোচৰৰ গুৰুত্ব বিবেচনা কৰি তদন্তত নিয়োজিত হৈ আছে। চিনাক্ত হোৱা ৩ অভিযুক্তক ধৰিবলৈ বিভিন্ন স্থানত অভিযান চলোৱা হৈছে। এই ঘটনাক লৈ স্থানীয় ৰাইজ তথা সামাজিক সংগঠনসমূহে অতি ক্ষুব্ধ হৈ দোষীক অতি সোনকালে শাস্তি প্ৰদানৰ দাবী জনাইছে।
