নগাঁৱৰ কলিয়াবৰ বৰুৱা চুকৰ ৭১৫ নং ৰাষ্ট্ৰীয় ঘাইপথত ৰোগী কঢ়িয়াই অনা এখন এম্বুলেঞ্চ আৰু পিকআপ বাহনৰ মাজত এক ভয়ংকৰ দুৰ্ঘটনা সংঘটিত হোৱাৰ খবৰ আহিছে। এই সংঘৰ্ষত এম্বুলেঞ্চখনত থকা ৰোগীৰ এজন আত্মীয়ৰ থিতাতে মৃত্যু হয়। শোকাৱহভাৱে মৃত্যুক আকোৱালি লোৱা লোকজনক সঞ্জয় ওৰাং বুলি জানিব পৰা গৈছে।
জানিব পৰা মতে, কলিয়াবৰ আমলখী চাহ বাগিছাৰ কাঞ্চন বস্তিৰ পৰা এম্বুলেঞ্চৰ জৰিয়তে চিকিৎসাৰ বাবে আহিছিল কলিয়াবৰ মহকুমা অসামৰিক চিকিৎসালয়লৈ। তেনে সময়তে বৰুৱা চুকত যোৰহাট দিশে (একে দিশে) গৈ থকা সংবাদ মাধ্যমৰ সামগ্ৰী কঢ়িয়াই নিয়া AS 01 RC 2989 নম্বৰৰ পিকআপ বাহনখনত এম্বুলেঞ্চখনে পাছফালৰ পৰা প্ৰচণ্ড জোৰত খুন্দা মাৰে।
এম্বুলেন্সখনত খুন্দা মৰাৰ পিছতেই সামগ্ৰী ভৰ্তি পিকআপ বাহনখন পথৰ কাষৰ হাবিয়নিত সোমায় পৰে। আনহাতে এম্বুলেঞ্চখনত থকা সঞ্জয় ওৰাঙৰ মৃত্যু হোৱাৰ লগতে সঞ্জয়ৰ পত্নী গুৰুতৰভাৱে আহত হয়।
আহত মহিলাগৰাকীক উন্নত চিকিৎসাৰ বাবে তেজপুৰ লৈ প্ৰেৰণৰ ব্যৱস্থা কৰে।
ৰাষ্ট্ৰীয় পথত থকা গতি ৰোধকৰ বাবেই দুৰ্ঘটনাটো সংঘটিত হোৱা বুলি স্থানীয় প্ৰত্যক্ষ দৰ্শীয়ে জানিবলৈ দিয়ে।
