২২ এপ্ৰিলত জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণে সমগ্ৰ দেশ কঁপাই তুলিছিল। এতিয়া এই বিষয়ত ৰাষ্ট্ৰসংঘৰ (UNSC) শেহতীয়া প্ৰতিবেদনে পাকিস্তানক পুনৰ এবাৰ উদঙাই দিছে।
ৰাষ্ট্ৰসংঘৰ নিৰাপত্তা পৰিষদৰ নিষেধাজ্ঞা নিৰীক্ষণকাৰী দলে কয় যে, দ্য ৰেজিষ্টেন্স ফ্ৰণ্টে দুবাৰকৈ পেহেলগাম আক্ৰমণৰ দায়িত্ব লোৱাৰ লগতে আক্ৰমণস্থলীৰ ছবিও প্ৰকাশ কৰিছে। এই দলটোৱে নিজৰ প্ৰতিবেদনত কয় যে, পাকিস্তানস্থিত লস্কৰ-ই-তৈবাৰৰ সমৰ্থন অবিহনে এই আক্ৰমণ সম্ভৱ নহ’লহেঁতেন।
ইউএনএছচিৰ আইএছআইএল (দাইছ), আল কায়দাৰ দৰে সন্ত্ৰাসবাদী সংগঠনৰ ওপৰত নিৰীক্ষণ কৰা দলটোৱে ৩৬ সংখ্যক প্ৰতিবেদন দাখিল কৰে। এই প্ৰতিবেদনত কোৱা হৈছে যে ২২ এপ্ৰিলত জম্মু-কাশ্মীৰৰ পেহেলগামত ৫টা সন্ত্ৰাসবাদীয়ে এটা পৰ্যটন স্থানত আক্ৰমণ চলাইছিল।
প্ৰতিবেদনত কোৱা হৈছে যে উক্ত ঘটনাৰ দিনটোত টি আৰ এফে এই আক্ৰমণৰ দায়িত্ব লোৱাৰ লগতে আক্ৰমণস্থলীৰ এখন ছবিও প্ৰকাশ কৰে। পিছদিনা এই আক্ৰমণৰ দায়িত্বও লৈছিল টি আৰ এফে। কিন্তু ২৬ এপ্ৰিলত টি আৰ এফে এই দাবীৰ পৰা পিছুৱাই গ’ল। তেতিয়াৰ পৰা টি আৰ এফে এই সন্দৰ্ভত কোনো বিবৃতি দিয়া নাই আৰু আন কোনো সন্ত্ৰাসবাদী সংগঠনেও এই আক্ৰমণৰ দায়িত্ব লোৱা নাই।
লস্কৰ-ই-তৈবাৰৰ সহায় অবিহনে এই আক্রমণ হ’ব নোৱাৰিলেহেঁতেন বুলি প্রতিবেদনত উল্লেখ কৰিছে টি আৰ এফে৷ লস্কৰ-ই-তৈবাৰ আৰু টি আৰ এফৰ মাজত সম্পৰ্ক আছে। এই আক্ৰমণ লস্কৰ-ই-তৈবাৰৰ সমাৰ্থক টি আৰ এফে সংঘটিত কৰিছিল বুলি বৰ্তমান স্পষ্ট হৈ উঠিছে।
উল্লেখ্য যে এই মাহতেই আমেৰিকাই টি আৰ এফক বিদেশী সন্ত্ৰাসবাদী সংগঠন বুলি ঘোষণা কৰে। চলিত বৰ্ষৰ ২২ এপ্ৰিলত পেহেলগামত সংঘটিত সন্ত্ৰাসবাদী আক্ৰমণত ২৬ জন লোক নিহত হৈছিল। এই আক্ৰমণ পেহেলগামৰ বৈছাৰণ উপত্যকাত সংঘটিত হৈছিল, য’ত সন্ত্ৰাসবাদীয়ে নিৰ্বাচিতভাৱে মানুহক লক্ষ্য কৰি লৈছিল।
