জম্মু-কাশ্মীৰৰ পেহেলগামত পাকিস্তান সমৰ্থিত সন্ত্ৰাসবাদীৰ নিৰ্মম আক্ৰমণত ২৭জন নিৰীহ নাগৰিকে প্ৰাণ হেৰুৱাৰ পিছতে ভাৰত আৰু পাকিস্তানৰ মাজত কূটনৈতিক উত্তেজনা বৃদ্ধি পাইছে।
পাকিস্তানৰ প্ৰাক্তন বৈদেশিক মন্ত্ৰী তথা পাকিস্তান পিপলছ পাৰ্টিৰ মুৰব্বী বিলোৱাল ভুট্টো জৰ্দাৰীয়ে আগ্ৰাসী আৰু উচটনিমূলক বক্তব্য দি পৰিস্থিতি আৰু অধিক ভয়াৱহ কৰি তোলে।
ৰাজহুৱা সমাৱেশত ভাষণ দি বিলোৱাল ভুট্টোৱে সিন্ধু জল সন্ধিক লৈ ভাৰতক পোনপটীয়াকৈ ভাবুকি দিয়ে। তেওঁ কয় যে, তেওঁ সিন্ধু নদীৰ পাৰত থিয় হৈ ভাৰতক ক’ব বিচাৰে যে সিন্ধু পাকিস্তানৰ আৰু ই পাকিস্তানৰে হৈ থাকিব। হয় পাকিস্তানলৈ সিন্ধুৰ পানী বৈ যাব অন্যথা ভাৰতীয়ৰ তেজৰ নৈ বৈ যাব। বিশেষকৈ পেহেলগাম আক্ৰমণে সমগ্ৰ দেশক শোক আৰু ক্ষোভত ডুবাই ৰখাৰ সময়তে এই বক্তব্যক ভাৰতৰ বিৰুদ্ধে হিংসাৰ মুকলি উচটনি হিচাপে দেখা গৈছে।
ভাৰতে বিশ্ব বেংকৰ মধ্যস্থতাত ১৯৬০ চনত কৰা সিন্ধু জল সন্ধি (IWT)ৰ পুনৰ বিবেচনাৰ প্ৰক্ৰিয়া আৰম্ভ কৰিছে। এই সন্ধি ভাৰত আৰু পাকিস্তানৰ মাজত পানীৰ ভাগ-বতৰা সন্দৰ্ভত এক ঐতিহাসিক চুক্তি হৈ আহিছে। কিন্তু অবিৰত সন্ত্ৰাসবাদী কাৰ্যকলাপ আৰু পাকিস্তানৰ অসহযোগী ভূমিকাৰ বাবে ভাৰতে এতিয়া ইয়াক স্থগিত ৰখাৰ সিদ্ধান্ত লৈছে।
পাকিস্তানী নেতা ভুট্টোৱে দাবী কৰে যে, ভাৰতে “সিন্ধু আক্ৰমণ” কৰিছে। তেওঁ কয় যে ভাৰতৰ জনসংখ্যা পাকিস্তানতকৈ বেছি হ’ব পাৰে, কিন্তু পাকিস্তানৰ জনসাধাৰণ সাহসী৷পাকিস্তানৰ কণ্ঠই ভাৰতক উপযুক্ত উত্তৰ দিব। এই বক্তব্যৰ পৰা স্পষ্ট যে পাকিস্তানৰ ৰাজনৈতিক নেতৃত্বই সন্ত্ৰাসবাদক নিন্দা কৰাৰ পৰিৱৰ্তে আগ্ৰাসী জাতীয়তাবাদক ইন্ধন যোগাইছে, যাৰ বাবে কূটনৈতিক আলোচনাৰ সম্ভাৱনা ক্ষীণ হৈ আহিছে।
পেহেলগামত সংঘটিত আক্ৰমণৰ পিছত ভাৰতে কেইবাটাও সুনিৰ্দিষ্ট পদক্ষেপ গ্ৰহণ কৰিছে। ইয়াৰ ভিতৰত কেৱল পাকিস্তানী নাগৰিকৰ ভিছা বাতিল কৰা আৰু তেওঁলোকৰ উভতি অহাৰ নিৰ্দেশনাই নহয়, ইয়াৰ লগত সিন্ধু জল সন্ধি “বন্ধ কৰাৰ দিশত পদক্ষেপ”ও সংযোজন কৰা হৈছে। ভাৰতে বিশ্ব বেংকৰ সৈতে এই সন্ধি নতুনকৈ পৰ্যালোচনা কৰি আছে।
