পেহেলগাম সন্ত্ৰাসবাদী আক্ৰমণৰ পিছত ভাৰতে প্ৰতিশোধৰ প্ৰস্তুতিৰ বাবেই পাকিস্তান চৰকাৰৰ আতংক স্পষ্টকৈ দেখা গৈছে। বুধবাৰে নিশা পাকিস্তানৰ প্ৰধানমন্ত্ৰী শ্বাহবাজ শ্বৰীফৰ সৈতে ফোনযোগে বাৰ্তালাপ কৰে আমেৰিকাৰ বিদেশ মন্ত্ৰী মাৰ্ক ৰুবিঅ’ই। ভাৰতত বৈদেশিক পৰিক্ৰমা মন্ত্ৰী এছক সাক্ষাৎ কৰে ৰুবিঅ’ই। ফোনযোগে জয়শংকৰৰ সৈতে শেহতীয়া পৰিস্থিতিৰ বিষয়ে আলোচনা কৰে।
ৰুবিঅ’ই পাকিস্তানৰ প্ৰধানমন্ত্ৰী শ্বেহবাজ শ্বৰীফক পেহেলগাম সন্ত্ৰাসবাদী আক্ৰমণৰ পিছত উত্তেজনা হ্ৰাস কৰাৰ বাবে ভাৰতৰ সৈতে কাম কৰিবলৈ আৰু প্ৰত্যক্ষ আলোচনা পুনৰ প্ৰতিষ্ঠা কৰিবলৈ পৰামৰ্শ দিয়ে। লগতে দক্ষিণ এছিয়াত শান্তি আৰু স্থিতিশীলতা প্ৰতিষ্ঠা কৰাৰ চেষ্টা কৰিবলৈ সকীয়নি দিয়ে।
ইয়াৰ উপৰিও আমেৰিকাৰ বিদেশ মন্ত্ৰীয়ে শ্বাহবাজ শ্বৰীফক পৰামৰ্শ দিয়ে যে, পাকিস্তানে পেহেলগাম সন্ত্ৰাসবাদী আক্ৰমণক গৰিহণা দিব লাগে। লগতে এনে আক্ৰমণত জড়িত সন্ত্ৰাসবাদী আৰু তেওঁলোকৰ আত্মগোপন স্থান ধ্বংস কৰিব লাগে।
ভাৰতৰ বৈদেশিক পৰিক্ৰমা মন্ত্ৰী এছ জয়শংকৰৰ সৈতেও ফোনযোগে যোগাযোগ কৰে ৰুবিঅ’ই। পেহেলগাম সন্ত্ৰাসবাদী আক্ৰমণত নিহত হোৱা পৰিয়াললৈ শোক প্ৰকাশ কৰে আমেৰিকাৰ বিদেশ মন্ত্ৰীগৰাকীয়ে। তেওঁ পুনৰ কয় যে, সন্ত্ৰাসবাদৰ বিৰুদ্ধে আমেৰিকা সদায় ভাৰতৰ সৈতে থিয় দিব।
শ্বাহবাজ শ্বৰীফে আমেৰিকাৰ বৈদেশিক মন্ত্ৰীৰ সৈতে কথা পাতি থকা অৱস্থাত দাবী কৰে যে পেহেলগাম সন্ত্ৰাসবাদী আক্ৰমণত তেওঁ পাকিস্তানৰ চৰকাৰ বা সেনা জড়িত থকাৰ কোনো প্ৰমাণ পোৱা নাই। আনহাতে ভাৰতে পাকিস্তানৰ বিৰুদ্ধে প্ৰমাণ আৰু সমৰ্থন সংগ্ৰহ কৰি আছে। প্ৰধানমন্ত্ৰী মোদীয়ে সেনাক নিজৰ পৰ্য্যায়ত ব্যৱস্থা গ্ৰহণৰ স্বাধীনতা প্ৰদান কৰিছে।
পেহেলগাম সন্ত্ৰাসবাদী আক্ৰমণত পুনৰ নিৰ্দোষতাৰ কথা পাকিস্তানৰ প্ৰধানমন্ত্ৰীৰ। তেওঁ পুনৰ কয় যে তেওঁ স্বচ্ছ, পুংখানুপুংখ আৰু স্বতন্ত্ৰ তদন্তৰ বাবেও সাজু। আনকি শ্বাহবাজে কয় যে সন্ত্ৰাসবাদৰ বিৰুদ্ধে যুদ্ধত পাকিস্তানে ৯০ হাজাৰ লোকৰ প্ৰাণ হেৰুৱাইছে আৰু প্ৰায় ১৫২ বিলিয়ন ডলাৰৰ ক্ষতি হৈছে।
