ভাৰতৰ সৈতে যুদ্ধ পাকিস্তানৰ বাবে এক ডাঙৰ আতংকৰ বিষয় হৈ পৰিছে। যুদ্ধৰ মাত্ৰ দুদিনতে পাকিস্তানৰ অৰ্থনৈতিক অৱস্থাৰ যথেষ্ট অৱনতি ঘটিছে। যাৰ বাবে পাকিস্তানে আন্তঃৰাষ্ট্ৰীয় ঋণৰ ভিক্ষা বিচাৰিছে।
৮ এপ্ৰিলত পাকিস্তান চৰকাৰৰ অৰ্থনৈতিক পৰিক্ৰমা বিভাগৰ অফিচিয়েল ‘X’ টুইটাৰ একাউণ্টৰ পৰা আন্তঃৰাষ্ট্ৰীয় সমাজ আৰু বিশ্ব বেংকৰ পৰা তাৎক্ষণিক ঋণ বিচাৰি এটা গুৰুত্বপূৰ্ণ টুইট পোষ্ট কৰা হয়।
চৰকাৰী টুইটটোত কোৱা হৈছে যে, পাকিস্তান চৰকাৰে শত্ৰুপক্ষৰ বৃহৎ লোকচানৰ পিছত আন্তঃৰাষ্ট্ৰীয় অংশীদাৰসকলৰ ওচৰত অধিক ঋণৰ বাবে আবেদন জনাইছে। যুদ্ধ ভয়াবহ হৈ উঠাত আৰু মজুত হ্ৰাস পোৱাৰ মাজতে তেওঁলোকে আন্তঃৰাষ্ট্ৰীয় অংশীদাৰসকলক উত্তেজনা হ্ৰাস কৰাত সহায় কৰিবলৈ আহ্বান জনায়।
পাকিস্তানৰ এই দাবীৰ পিছত সমগ্ৰ বিশ্বতে দেশখনৰ সমালোচনা হ’বলৈ আৰম্ভ হৈছে। অৱশ্যে খবৰ অনুসৰি, পাকিস্তানে তেওঁলোকৰ অৰ্থনৈতিক পৰিক্ৰমা মন্ত্ৰালয়ৰ ‘X’ একাউণ্ট হেক হোৱা বুলি কয়। এই টুইটৰ লগত পাকিস্তানৰ কোনো সম্পৰ্ক নাই বুলি তেওঁলোকে সদৰী কৰে।
এই টুইটটোৱে স্পষ্টভাৱে ইংগিত দিয়ে যে ভাৰত আৰু পাকিস্তানৰ মাজত চলি থকা সংঘাতত পাকিস্তানে বৃহৎ অৰ্থনৈতিক ক্ষতিৰ সন্মুখীন হৈছে। একে সময়তে তেওঁৰ শান্তিৰ আবেদনে দেখুৱাইছে যে ভাৰতীয় প্রতিশোধমূলক আক্রমণত তেওঁৰ সেনাবাহিনীও ভাঙি গৈছে৷ বিশ্লেষকসকলৰ মতে এই টুইটটোৱে পাকিস্তানৰ অসহায় পৰিস্থিতিৰ ওপৰত আলোকপাত কৰিছে, য’ত মাত্ৰ দুদিনৰ ভিতৰতে পাকিস্তানে বিশ্বব্যাপী সহায় বিচাৰিছে।
