ভাৰতৰ কাশ্মীৰক নিজৰ বুলি দাবী কৰা পাকিস্তানে নিজ দেশৰেই সুচাৰুৰূপে পৰিচালনা কৰিবলৈ সক্ষম হোৱা নাই। এফালে বেলুচিস্তানে দাবী উত্থাপন কৰিছে, আনফালে সিন্ধুপ্ৰদেশৰ জনসাধাৰণেও সুকীয়া দেশৰ দাবী জনাইছে।
বেলুচিস্তান এতিয়া পাকিস্তানৰ অংশ নহয় বুলি দাবী কৰিছে বেলুচ নেতাসকলে। বেলুচিস্তানক সুকীয়া দেশ হিচাপে গঢ়ি তুলিবলৈ তেওঁলোকে আন্তঃৰাষ্ট্ৰীয় সমাজৰ পৰা সহায় বিচাৰিছে।
বেলুচ নেতা মিৰ য়াৰ বালোচে সামাজিক মাদ্যমত পোষ্ট কৰি কয় যে, বেলুচিস্তানৰ জনসাধাৰণে নিজৰ সিদ্ধান্ত লৈছে আৰু এতিয়া বিশ্বই মৌনতা অৱলম্বন কৰা উচিত নহয়। তেওঁ ভাৰতকে ধৰি আন্তঃৰাষ্ট্ৰীয় সমাজৰ পৰা সমৰ্থন বিচাৰি আবেদন জনাইছে। তেওঁ ভাৰতীয় সংবাদ মাধ্যম, ইউটিউবাৰ আৰু বুদ্ধিজীৱীসকলক বেলুচসকলক পাকিস্তানৰ মানুহ বুলি কোৱা বন্ধ কৰিবলৈ আহ্বান জনায়।
মিৰ ইয়াৰ বালোচে কয় যে, পাকিস্তানক দিয়া আন্তঃৰাষ্ট্ৰীয় সাহায্য আৰু ঋণ আছিল ধনৰ অপচয়। ১৯৪৭ চনৰ পৰা ২০২৫ চনলৈকে পাকিস্তানে পশ্চিম, আই এম এফ, বিশ্ব বেংকৰ পৰা কোটি কোটি টকা লাভ কৰিছে। পাকিস্তানে সন্ত্ৰাসবাদৰ বিৰুদ্ধে যুদ্ধৰ নামত আমেৰিকাৰ পৰা ধন লৈছিল যদিও এই ধনেৰে সন্ত্ৰাসবাদীক ধন দি ৫০০০ তকৈ অধিক আমেৰিকানক হত্যা কৰিছিল।
পাক অধীকৃত কাশ্মীৰ (PoK) খালী কৰাৰ ভাৰতৰ দাবীক মিৰ য়াৰ বালোচে সম্পূৰ্ণৰূপে সমৰ্থন কৰে। তেওঁ আন্তঃৰাষ্ট্ৰীয় সমাজক পাকিস্তানক এই অঞ্চল খালী কৰিবলৈ হেঁচা প্ৰয়োগ কৰিবলৈ আহ্বান জনায়। মিৰ ইয়াৰে কয় যে ২০২৫ চনৰ ১৪ মে’ত PoK খালী কৰিবলৈ পাকিস্তানক কোৱাৰ সিদ্ধান্তক বেলুচিস্তানে সম্পূৰ্ণৰূপে সমৰ্থন কৰে। মীৰ সকীয়াই দিয়ে যে, যদি পাকিস্তানে এই দাবী নুশুনে, তেন্তে প’কবাসীক মানৱ ঢাল হিচাপে ব্যৱহাৰ কৰা পাকিস্তানী সেনাৰ জেনেৰেলসকল ঢাকাৰ দৰে ৯৩০০০ সৈনিকৰ আন এক লজ্জাজনক পৰাজয়ৰ বাবে একমাত্ৰ দায়ী হ’ব।
