পেহেলগাম সন্ত্ৰাসবাদী আক্ৰমণৰ লগত জড়িত লস্কৰ-ই-তৈবাৰ ফ্ৰণ্ট সংগঠন দ্য ৰেজিষ্টেন্স ফ্ৰন্টৰ ওপৰত আমেৰিকাই নিষেধাজ্ঞা আৰোপ কৰাৰ পিছত পাকিস্তানত আলোড়নৰ সৃষ্টি হৈছে। ভাৰতৰ সম্ভাৱ্য বিমান আক্ৰমণক লৈ যেন পাকিস্তান সতৰ্ক। এই কাৰণেই ইয়াৰ আকাশমাৰ্গত এসপ্তাহ ধৰি NOTAM জাৰি কৰিছে।
পাকিস্তানৰ সামৰিক বিষয়াসকলৰ মতে, ১৬ জুলাইৰ পৰা ২৩ জুলাইলৈ কেন্দ্ৰীয় খণ্ডৰ আকাশমাৰ্গ সম্পূৰ্ণৰূপে বন্ধ থাকিব। একে সময়তে দক্ষিণ পাকিস্তানৰ আকাশী সীমান্তও ২২ আৰু ২৩ জুলাইত বন্ধ কৰি দিয়া হৈছে। অৱশ্যে আনুষ্ঠানিকভাৱে ইয়াক সামৰিক অনুশীলন বা মিছাইল পৰীক্ষা বুলি অভিহিত কৰা হৈছে।
সূত্ৰ অনুসৰি শেহতীয়াকৈ পাকিস্তানত চীনৰ মালবাহী বিমানৰ গতিবিধি দেখা গৈছে। ইয়াৰ ফলত চীনে পাকিস্তানক নতুন সামৰিক প্ৰযুক্তি, অস্ত্ৰ-শস্ত্ৰ আৰু বায়ু প্ৰতিৰক্ষা ব্যৱস্থা যোগান ধৰাৰ সন্দেহ আৰু অধিক শক্তিশালী হৈছে।
পেহেলগাম সন্ত্ৰাসবাদী আক্ৰমণ আৰু অপাৰেচন সিন্দুৰৰ পিছত ভাৰত-পাকিস্তানৰ সম্পৰ্কত অধিক উত্তেজনা সৃষ্টি হৈছে। পেহেলগামত পৰ্যটকৰ ওপৰত হোৱা আক্ৰমণত পাকিস্তান সমৰ্থিত সন্ত্ৰাসবাদী সংগঠন টি আৰ এফ জড়িত থকাৰ বাবে ভাৰতে কঠোৰ স্থিতি ল’বলৈ বাধ্য হয়। ইয়াৰ প্ৰতিশোধ হিচাপে ভাৰতে অপাৰেচন সিন্দুৰৰ অধীনত সীমান্তৰ সিপাৰে সন্ত্ৰাসবাদীৰ আত্মগোপন স্থানক লক্ষ্য কৰি লয়। এই ঘটনাৰ পিছত পাকিস্তানে ভাৰতৰ বাবে আকাশমাৰ্গ বন্ধ কৰি সামৰিক কাৰ্যকলাপ তীব্ৰতৰ কৰি তুলিলে। দুয়োখন দেশৰ মাজত যোগাযোগ প্রায় স্তব্ধ হৈ পৰাৰ লগতে সীমান্তত নিৰাপত্তাৰক্ষীৰ নিয়োগ বৃদ্ধি পোৱাৰ ফলত পৰিস্থিতি অধিক ভয়াৱহ হৈ পৰিছে৷
পেহেলগাম সন্ত্ৰাসবাদী আক্ৰমণৰ লগত জড়িত লস্কৰ-ই-তৈবাৰ এটা ফ্ৰণ্ট সংগঠন ‘দ্য ৰেজিষ্টেন্স ফ্ৰন্ট’ত নিষেধাজ্ঞা আৰোপ কৰিছে আমেৰিকাই। এই সংগঠনটো জম্মু-কাশ্মীৰত সন্ত্ৰাসবাদী কাণ্ড সংঘটিত কৰি অহা লস্কৰৰ এটা লুকাই থকা শাখা।
আমেৰিকাৰ বিদেশ মন্ত্ৰালয়ে টি আৰ এফক বিশ্বব্যাপী সন্ত্ৰাসবাদী সংগঠন হিচাপে ঘোষণা কৰি ইয়াৰ সম্পত্তি জব্দ কৰাৰ লগতে আমেৰিকাৰ নাগৰিকৰ সৈতে যিকোনো ধৰণৰ লেনদেন নিষিদ্ধ কৰাৰ সিদ্ধান্ত লৈছে। এনে সময়তে এই পদক্ষেপ লোৱা হৈছে যেতিয়া ভাৰতে আন্তঃৰাষ্ট্ৰীয় মঞ্চত টি আৰ এফৰ ভূমিকা সম্পৰ্কে ধাৰাবাহিকভাৱে প্ৰমাণ আগবঢ়াই আহিছে। ইয়াৰ ফলত পাকিস্তানৰ ওপৰত কূটনৈতিক হেঁচা আৰু অধিক বৃদ্ধি পাব।
