আজি অৰ্থাৎ ১৪ আগষ্টত পাকিস্তানে পালন কৰিছে ৭৯ সংখ্যক স্বাধীনতা দিৱস। এই বিশেষ দিনটোত কৰাচী চহৰৰ সুখ শোকলৈ পৰিণত হ’ল। স্বাধীনতা দিৱস উদযাপনৰ সময়তে গুলীচালনাত তিনিজনকৈ লোক নিহত হয়। য’ত আছিল এগৰাকী ৮ বছৰীয়া কিশোৰী আৰু এগৰাকী জ্যেষ্ঠ নাগৰিক।
স্থানীয় সংবাদ মাধ্যমৰ মতে, আজিজাবাদত যেতিয়া এটি কণমানিয়ে ৰাজপথত খোজ কাঢ়ি গৈ আছিল, তেতিয়াই গুলীচালনাত মৃত্যুক সাৱটি ল’ব লগা হয়। কোৰাংগীত ষ্টিফেন নামৰ এজন ব্যক্তিৰ মৃত্যু হোৱা বুলি নিশ্চিত হৈছে।
স্থানীয় আৰক্ষীৰ মতে, কৰাচীৰ বহু অঞ্চলত গুলীচালনাৰ ঘটনা সংঘটিত হোৱাৰ বাতৰি পোৱা গৈছে। ইয়াৰ ভিতৰত মূলতঃ লিয়াকুৱাতাবাদ, কোৰংগী, লিয়াৰী, মাহমুদাবাদ, আখতাৰ কলনী, কেমাৰী, জেকচন, বলদিয়া, ওৰঙী টাউন আৰু পাপোছ নগৰ আদি অঞ্চল। একে সময়তে শ্বৰীফাবাদ, উত্তৰ নাজিমাবাদ, সুৰজানি টাউন, জামান টাউন, লান্ধী আদি অঞ্চলসমূহো ইয়াৰ দ্বাৰা ক্ষতিগ্ৰস্ত হৈছে।
এই গুলীচালনাত আহত লোকসকলক চিভিল, জিন্না আৰু আব্বাছি শ্বহীদ চিকিৎসালয়ৰ লগতে ব্যক্তিগত চিকিৎসালয়লৈ লৈ যোৱা হৈছে। আৰক্ষীয়ে তৎপৰতা প্ৰদৰ্শন কৰি বিভিন্ন অঞ্চলৰ পৰা ২০ জনতকৈ অধিক সন্দেহযুক্ত লোকক গ্ৰেপ্তাৰ কৰিছে। তেওঁলোকৰ পৰা উদ্ধাৰ হৈছে আধুনিক অস্ত্ৰ-শস্ত্ৰ আৰু বহুতো গুলী।
আৰক্ষীয়ে জনাইছে যে, এই আকাশী গুলীচালনাৰ লগত জড়িতসকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব। পাকিস্তানত স্বাধীনতা দিৱস উদযাপনৰ সময়ত প্ৰতি বছৰে সংঘটিত হয় গুলীচালনাৰ ঘটনা। ২০২৪ চনতো এনে ঘটনা পোহৰলৈ আহিছিল।ইয়াত এটা শিশুৰ মৃত্যু হোৱাৰ লগতে ৯৫ জনতকৈ অধিক লোক আহত হৈছিল।
তথ্য অনুসৰি ২০২৪ চনৰ জানুৱাৰী মাহত সমগ্ৰ কৰাচী চহৰত গুলীচালনাৰ বিভিন্ন কাণ্ডত কমেও ৪২ জন লোকৰ মৃত্যু হৈছে।এই কাণ্ডসমূহত ২৩৩ জন লোক আহত হৈছে।
