পঞ্জাৱ হৈছে পাকিস্তানৰ সৰ্ববৃহৎ ঘেঁহু উৎপাদনকাৰী অঞ্চল। দেশৰ প্ৰায় ৮০ শতাংশ ঘেঁহু ইয়াৰ পৰাই আহে। সম্প্ৰতি পঞ্জাৱৰ পৰা ঘেঁহু অনাৰ ক্ষেত্ৰত অনিৰ্দিষ্টকালীন নিষেধাজ্ঞা আৰোপ কৰা হৈছে। ইয়াৰ ফলত সিন্ধ, বেলুচিস্তান, খাইবাৰ পখতুনখোৱা আদি অঞ্চলত আটাৰ ভয়াৱহ নাটনি হৈছে।
ইফালে পঞ্জাৱ চৰকাৰে কয় যে, এনেধৰণৰ কোনো চৰকাৰী বাধা আৰোপ কৰা হোৱা নাই। বিষয়াসকলে দাবী কৰে যে কেৱল অস্বাভাৱিক গতিবিধি নিৰীক্ষণৰ বাবেহে চেকপইণ্ট স্থাপন কৰা হৈছে, কিন্তু বাস্তৱত ঘেঁহু আৰু আটা কঢ়িয়াই অনা ট্ৰাকসমূহ চেকপইণ্টত ৰখাই দিয়া হৈছে, আৰু কেইবাখনো বাহন জব্দ কৰা হৈছে। আন আন প্ৰদেশসমূহে অভিযোগ কৰে যে এই নীতিয়ে সংবিধানৰ ১৫১ নং অনুচ্ছেদ উলংঘা কৰে, যিয়ে সমগ্ৰ দেশতে মুক্ত বাণিজ্যৰ নিশ্চয়তা প্ৰদান কৰে।
এক প্ৰতিবেদন অনুসৰি, সিন্ধ আৰু খাইবাৰ পখতুনখোৱাই পঞ্জাৱৰ নীতিৰ তীব্ৰ বিৰোধিতা কৰিছে। অল পাকিস্তান ফ্লাৱাৰ মিলছ এছ’চিয়েশ্যনে এই সিদ্ধান্ত অসাংবিধানিক আৰু জাতীয় ঐক্যৰ বিৰোধী বুলি উল্লেখ কৰিছে। খাইবাৰ পখতুনখোৱাৰ ৰাজ্যপাল ফৈছাল কৰিম কুণ্ডীয়ে ইয়াক জাতীয় ঐক্যৰ গুৰুতৰ উলংঘা বুলি অভিহিত কৰিছে। খাইবাৰ পাখতুনখোৱা বিধানসভাইও ইয়াক গৰিহণা দি এক প্ৰস্তাৱ গৃহীত কৰিছে।
২০ কিলোগ্ৰামৰ আটাৰ বস্তা এটাৰ দাম পঞ্জাৱত প্ৰায় ১৮০০ টকা, আনহাতে একে বস্তা খাইবাৰ পখতুনখোৱাত ২৮০০ টকাত বিক্ৰী কৰা হৈছে। ইয়াৰ ফলত মূল্য ৬৮ শতাংশ বৃদ্ধি পাইছে। ইয়াৰ ফলত সাধাৰণ জনতাৰ ওপৰত মুদ্ৰাস্ফীতিৰ বোজা আৰু অধিক বৃদ্ধি পাইছে। চৰকাৰৰ নীতিক লৈ অসন্তুষ্টি প্ৰকাশ কৰিছে ৰাইজে। ইতিমধ্যে মুদ্ৰাস্ফীতিৰ তলত লৰচৰ কৰি আছে পাকিস্তান। অর্থনৈতিক পৰিস্থিতিৰ অৱনতি ঘটাৰ বাবে দৈনন্দিন সামগ্রী অতি দামী হৈ পৰিছে৷ ভাৰতত আটাৰ দাম বিবেচনা কৰিলে বৰ্তমান ১ কুইণ্টল (১০০ কিলোগ্ৰাম) আটাৰ পাইকাৰী মূল্য ২,৯০০ টকা। অৱশ্যে কিলোগ্ৰামৰ ওপৰত নিৰ্ভৰ কৰি খুচুৰা মূল্য অধিক হ’ব।
পাকিস্তানী ৱেবছাইটৰ এক প্ৰতিবেদন অনুসৰি পাকিস্তানত বৰ্তমান এক কিলোগ্ৰাম দাইলৰ মূল্য প্ৰতি কিলোগ্ৰামত ৩০০ টকাতকৈ অধিক। উদাহৰণ স্বৰূপে চানা দাইলৰ দাম প্ৰতি কিলোগ্ৰামত ৩৬০ পাকিস্তানী টকা। মুগ দাইলৰ মূল্য প্ৰতি কিলোগ্ৰাম ৫১০ টকা। মচুৰ দাইলৰ মূল্য প্ৰতি কিলোগ্ৰাম ৩৬০ টকা।
