সন্ত্ৰাসবাদীক আশ্ৰয় দিয়াৰ বাবে বিশ্বজুৰি কুখ্যাত পাকিস্তানে পুনৰবাৰ সংঘটিত কৰিলে এক ঘৃণনীয় কাণ্ড। অৰুণাচল প্ৰদেশ সন্দৰ্ভত চীনৰ উচটনিমূলক বক্তব্যক সমৰ্থন পাকিস্তান বৈদেশিক মন্ত্ৰালয়ৰ।
বলপূৰ্বকভাৱে আনৰ মাটি দখল কৰাটো চীনৰ এক দীৰ্ঘদিনীয়া প্ৰথা। সেই কামত ব্যৰ্থ হ’লেও নিজৰ বুলি দাবী কৰিয়েই থাকে। চীনে টাইৱানৰ সৈতে একে কাম কৰিবলৈ চেষ্টা কৰি আহিছে।
পাকিস্তানৰ বৈদেশিক মন্ত্ৰালয়ে এক বিবৃতি প্ৰকাশ কৰি কয় যে, পাকিস্তানে অৰুণাচল প্ৰদেশ সন্দৰ্ভত চীনৰ বক্তব্য লক্ষ্য কৰিছে। চীনৰ সাৰ্বভৌমত্ব আৰু ভূখণ্ডৰ অখণ্ডতাৰ সৈতে জড়িত বিষয়ত পাকিস্তানে চীনক সমৰ্থন কৰি যাব। শেহতীয়াকৈ চীনে স্বেচ্ছাচাৰীভাৱে অৰুণাচল প্ৰদেশৰ এগৰাকী মহিলাক আটক কৰি ৰখাৰ ফলত ব্যাপক হুলস্থুলৰ সৃষ্টি হয়। চীনে মহিলাগৰাকীৰ পাছপ’ৰ্ট অবৈধ বুলি ঘোষণা কৰে।
চীনৰ বৈদেশিক মন্ত্ৰালয়ৰ মুখপাত্ৰ মাও নিঙে উল্লেখ কৰে যে জাংনান (অৰুণাচল প্ৰদেশ) চীনৰ অংশ। তেওঁ উল্লেখ কৰে যে, ভাৰতে অবৈধভাৱে সংলগ্ন কৰা অৰুণাচল প্ৰদেশক চীনে কেতিয়াও স্বীকৃতি দিয়া নাই। ভাৰতে চীনৰ প্ৰতি কঠোৰ প্ৰতিক্ৰিয়া প্ৰকাশ কৰি কয় যে, মহিলাগৰাকীৰ বৈধ পাছপ’ৰ্ট আছে আৰু তেওঁ জাপানলৈ আগন্তুক যাত্ৰাৰ বাবে চাংহাই আন্তঃৰাষ্ট্ৰীয় বিমানবন্দৰৰ পৰা ৰাওনা হৈছে।
ভাৰতীয় বৈদেশিক মন্ত্ৰালয়ৰ মুখপাত্ৰ ৰণধীৰ জয়ছৱালে উল্লেখ কৰে যে অৰুণাচল প্ৰদেশ ভাৰতৰ এক অবিচ্ছেদ্য অংগ আৰু এয়া এক স্বতঃস্ফূৰ্ত সত্য। চীনৰ পক্ষই যিমানেই অস্বীকাৰ কৰিবলৈ চেষ্টা নকৰক কিয়, এই অনস্বীকাৰ্য বাস্তৱতা সলনি নহ’ব৷ তেওঁ কয়, “চীনা পক্ষৰ সৈতে আটক কৰাৰ বিষয়টো তীব্ৰভাৱে উত্থাপন কৰা হৈছে। চীনৰ বিষয়াসকলে এতিয়াও তেওঁলোকৰ এই কাৰ্য্যৰ ব্যাখ্যা দিব পৰা নাই, যিয়ে আন্তঃৰাষ্ট্ৰীয় বিমান যাত্ৰা নিয়ন্ত্ৰণ কৰা কেইবাটাও চুক্তি উলংঘা কৰিছে।”
পাকিস্তানৰ এই আনুষ্ঠানিক বক্তব্য এনে সময়ত প্ৰকাশ কৰিছে যেতিয়া ৰাছিয়াৰ ৰাষ্ট্ৰপতি ভ্লাদিমিৰ পুটিন দুদিনীয়া ভ্ৰমণসূচীৰে ভাৰতত উপস্থিত হৈছিল। ভাৰত আৰু ৰাছিয়াৰ যৌথ বিবৃতিত সন্ত্ৰাসবাদৰ বিৰুদ্ধে ইজনে সিজনক সমৰ্থন কৰিবলৈ সন্মত হয়। পেহেলগাম সন্ত্ৰাসবাদী আক্ৰমণৰ পিছত ভাৰতৰ অপাৰেচন সিন্দুৰক ৰাছিয়াই সমৰ্থন কৰিছিল।
অৰুণাচল প্ৰদেশ ভাৰতৰ উত্তৰ-পূবত অৱস্থিত। ইয়াৰ সীমা ভূটান, চীন, আৰু ম্যানমাৰ। চীনৰ পৰিস্থিতি এনেকুৱা যে কেৱল অৰুণাচল প্ৰদেশেই নহয় সমগ্ৰ জম্মু-কাশ্মীৰকো নিজৰ মানচিত্ৰত নিজৰ অংশ হিচাপে ঘোষণা কৰিছে। বেইজিঙত অনুষ্ঠিত দ্বিতীয়খন বেল্ট এণ্ড ৰোড ইনিচিয়েটিভ (বি আৰ আই) শীৰ্ষ সন্মিলনত চীনে জম্মু-কাশ্মীৰ আৰু অৰুণাচল প্ৰদেশক ভাৰতৰ অংশ হিচাপে চিত্ৰিত কৰিছিল। শেহতীয়াকৈ চীনে অৰুণাচল প্ৰদেশ আৰু জম্মু-কাশ্মীৰক ভাৰতৰ অংশ হিচাপে দেখুওৱা প্ৰায় ৩০ হাজাৰ মানচিত্ৰ সম্পূৰ্ণৰূপে ধ্বংস কৰিছে।
