আজি পঞ্চায়ত নিৰ্বাচন ২০২৫ৰ ভোটগণনা। পুৱা ৮ বজাৰ পৰা আৰম্ভ হৈছে এই ভোটগণনা। কটকটীয়া নিৰাপত্তাৰ মাজেৰে ৰাজ্যৰ ৩৯ টা ভোটকেন্দ্ৰত গণনা আৰম্ভ হৈছে।
উল্লেখ্য যে, ৰাজ্যৰ ২৭ জিলাত অনুষ্ঠিত হৈছিল পঞ্চায়ত নিৰ্বাচন। ২ মে’ত প্ৰথম পৰ্যায়ত ৰাজ্যৰ ১৪ খন জিলা ক্ৰমে তিনিচুকীয়া, ডিব্ৰুগড়, চৰাইদেউ, শিৱসাগৰ, মাজুলী, যোৰহাট, গোলাঘাট, ধেমাজি, লখিমপুৰ, শোণিতপুৰ, বিশ্বনাথ, কাছাৰ, হাইলাকান্দি আৰু শ্রীভূমিত পঞ্চায়ত নিৰ্বাচনৰ প্ৰথম পৰ্যায়ৰ ভোটগ্ৰহণ অনুষ্ঠিত হয়।
আকৌ ৭ মে’ত দ্বিতীয় তথা অন্তিম পৰ্যায়ৰ ভোটগ্ৰহণ হয়। মধ্য আৰু নামনি অসমৰ ১৩ খন জিলাত হয় এই ভোটগ্ৰহণ। জিলাকেইখন হ’ল- ধুবুৰী, দক্ষিণ শালমৰা-মানকাচৰ, গোৱালপাৰা, বঙাইগাওঁ, বৰপেটা, বজালী, নলবাৰী, কামৰূপ, কামৰূপ মহানগৰ, হোজাই, নগাওঁ, মৰিগাওঁ আৰু দৰং।
বিয়লি ৪.৩০ বজালৈ হ’ব এই ভোটগণনা। পঞ্চায়ত নিৰ্বাচনৰ প্ৰথম পৰ্যায়ত মুঠ ভোটাৰৰ সংখ্যা ৮৯,৬০,৫৭৭ গৰাকী। ইয়াৰে পুৰুষ ভোটাৰৰ সংখ্যা ৪৪,৬৬,৯৮৪ জন, মহিলা ভোটাৰৰ সংখ্যা ৪৪,৯৩,৪২৯ আৰু ১৬৪ গৰাকী অন্যান্য ভোটাৰ বুলি জানিব পৰা গৈছে।।
আকৌ দ্বিতীয় পৰ্যায়ৰ মুঠ ভোটাৰৰ সংখ্যা হ’ল ৯১ লাখ ৩১ হাজাৰ ১২৭ জন। ইয়াৰ ভিতৰত ৪৬ লাখ ৩০ হাজাৰ ৯২৪ জন পুৰুষ আৰু ৪৪ লাখ ৯৯ হাজাৰ ৯৫২ গৰাকী মহিলা আৰু ২৫১ জন অন্যান্য ভোটাৰ।
ইতিমধ্যে জিলা পৰিষদৰ ৩৯৭ খন আসনৰ বিজেপি মিত্ৰজোটে দখল কৰিছে ৪৮ খন আসন আৰু কংগ্ৰেছৰ দখললৈ ৩খন আসন। আকৌ আঞ্চলিক পৰিষদৰ ২১৯২ খন আসনৰ বিজেপিয়ে দখল কৰিছে ২২৯খন আসন আৰু কংগ্ৰেছে দখল কৰিছে ২ খন আসন।
