৯ মাহৰো অধিক অপেক্ষাৰ অন্তত অৱশেষত মহাকাশ ষ্টেচনক বিদায় জনাই ধৰালৈ উভতিল ভাৰতীয় মূলৰ মহাকাশচাৰী সুনীতা উইলিয়ামছ। তেওঁৰ সৈতে পৃথিৱীলৈ উভতিছে বুচ উইলমোৰ, নিকহগ আৰু আলেকজেণ্ডাৰ গৰ্বুন’ভ। স্পেচ এক্সৰ ড্ৰেগন কেপচুলৰ জৰিয়তে উভতি আহে মহাকাশচাৰী চাৰিজন।
আন্তঃৰাষ্ট্ৰীয় মহাকাশ কেন্দ্ৰৰ পৰা উৰণৰ ১৭ ঘণ্টাৰ পাছত ভাৰতৰ সময় অনুসৰি পুৱা ৩.২৭ বজাত আমেৰিকাৰ ফ্ল’ৰিডা উপকূলৰ সমীপৰ সাগৰত পেৰাচ্যুটৰ সহায়ত অৱতৰণ কৰে ড্ৰেগন কেপচুল।
ইফালে সফলতাৰে পৃথিৱীত ভৰি দিয়াৰ পিছতে সুনীতাৰ মাতৃয়ে সংবাদ মাধ্যমৰ আগত কয় যে মই মোৰ ছোৱালীক লৈ গৌৰৱ অনুভৱ কৰিছো।
আনহাতে প্ৰধানমন্ত্ৰী নৰেন্দ্ৰ মোদীয়েও সুনীতা উইলিয়ামছলৈ এখন পত্ৰ লিখি ভাৰতত তেওঁক লগ পাবলৈ আগ্ৰহী বুলি উল্লেখ কৰিছে। মঙলবাৰে কেন্দ্ৰীয় মন্ত্ৰী জিতেন্দ্ৰ সিঙে টুইটাৰযোগে শ্বেয়াৰ কৰা ১ মাৰ্চৰ এখন পত্ৰত প্ৰধানমন্ত্ৰীয়ে লিখিছে যে আমেৰিকা ভ্ৰমণৰ সময়ত ট্ৰাম্প আৰু জ’ বাইডেনৰ সৈতে হোৱা আলোচনাকালত সুনীতা উইলিয়ামছৰ স্বাস্থ্যৰ বিষয়ে সোধা-পোচা কৰা হৈছিল।
পত্ৰখনত মোদীয়ে আৰু লিখিছে, ‘ভাৰতবাসীৰ হৈ আপোনালৈ মোৰ শুভেচ্ছা জ্ঞাপন কৰিছো। আজি জনপ্ৰিয় মহাকাশচাৰী মাইক মেছিমিনোক সাক্ষাত কৰো। আলোচনাৰ সময়ত তোমাৰ কথা প্ৰসংগ আহে আৰু মই কও যে আমি আপোনাক লৈ আৰু আপোনাৰ প্ৰাপ্তিক লৈ কিমান গৰ্বিত। এই আলোচনাৰ পিছতে এই চিঠিখন লিখাৰ পৰা মই নিজকে ৰখাব নোৱাৰিলো।’
পত্ৰখনত প্ৰধানমন্ত্ৰীগৰাকীয়ে আৰু লিখিছে যে ১৪ কোটি ভাৰতীয়ই আপোনাৰ এই কৃতিত্বক লৈ সদায় গৌৰৱ কৰি আহিছে। শেহতীয়া পৰিঘটনাই আপোনাৰ প্ৰেৰণাদায়ক অধ্যৱসায় আৰু কঠোৰ পৰিশ্ৰমক আকৌ এবাৰ জিলিকাই তুলিছে। আপুনি হাজাৰ হাজাৰ মাইল দূৰত থাকিলেও আমাৰ হৃদয়ৰ বহুত ওচৰত। ভাৰতবাসীয়ে আপোনাৰ সুস্বাস্থ্য আৰু মিছনৰ সফলতাৰ বাবে প্ৰাৰ্থনা জনাইছে।
