দুদিনীয়া ভ্ৰমণসূচীৰে শনিবাৰে কুৱেইটত উপস্থিত হোৱা ভাৰতৰ প্ৰধানমন্ত্ৰী নৰেন্দ্ৰ মোদীক উষ্ম আদৰণি জনোৱা হৈছে। এই ভ্ৰমণৰ সময়তে আৰবী ভাষাত লিখি উলিওৱা ৰামায়ণ আৰু মহাভাৰত গ্ৰন্থ দুখনো উপহাৰ হিচাপে লাভ কৰে প্ৰধানমন্ত্ৰী মোদীয়ে।
প্ৰধানমন্ত্ৰী মোদীয়ে কুৱেইটত আব্দুল্লা আল বাৰুন আৰু আব্দুল্লাতিফ আলনেছেফক সাক্ষাৎ কৰে। প্ৰধানমন্ত্ৰী মোদীয়ে দুয়োৰে শলাগ লৈ তেওঁলোকৰ গ্ৰন্থ দুখনত স্বাক্ষৰ কৰে। প্ৰধানমন্ত্ৰী মোদীয়ে কয় যে তেওঁলোকে মহান কাম কৰিছে।
দৰাচলতে আব্দুল্লা আল বাৰুনে ৰামায়ণ আৰু মহাভাৰত গ্ৰন্থ দুখন আৰবী ভাষালৈ অনুবাদ কৰিছে। আনহাতে আব্দুল্লাতিফ আলনেছেফে ৰামায়ণ আৰু মহাভাৰতৰ আৰবী সংস্কৰণ প্ৰকাশ কৰিছে। এই দুয়োজন লোকৰ কথা ইয়াৰ পূৰ্বে প্ৰধানমন্ত্ৰী মোদীয়ে মন কি বাটত উল্লেখ কৰিছিল।
ভাৰতীয় ইতিহাসৰ জীৱন্ত সাক্ষী ১০১ বছৰীয়া আই এফ এছ বিষয়া মংগল সেন হাণ্ডাকো প্ৰধানমন্ত্ৰীয়ে সাক্ষাৎ কৰে।
প্ৰধানমন্ত্ৰী মোদীক সাক্ষাৎ কৰাৰ পাছত গ্ৰন্থ প্ৰকাশক আব্দুল্লাতিফ আলনেছেফে কয়, ‘মই অতি সুখী, মোৰ বাবে ই এক সন্মান। এই কথাত বৰ সুখী প্ৰধানমন্ত্ৰী মোদী। এই কিতাপবোৰ অতি গুৰুত্বপূৰ্ণ। দুয়োখন গ্ৰন্থতে স্বাক্ষৰ কৰিছে প্ৰধানমন্ত্ৰী মোদীয়ে। এইটো তেওঁৰ জীৱনৰ এটা ডাঙৰ মুহূৰ্ত, যিটো তেওঁৰ লগত চিৰদিনৰ বাবে থাকিব।’
কুৱেইটৰ মিছাল আল-আহমদ আল-জাবেৰ আল-ছাবাহৰ বিশেষ আমন্ত্ৰণত দুদিনীয়া কুৱেইট ভ্ৰমণলৈ গৈছে প্ৰধানমন্ত্ৰী নৰেন্দ্ৰ মোদী। ৪৩ বছৰৰ ভিতৰত এয়া কোনো ভাৰতীয় প্ৰধানমন্ত্ৰীৰ প্ৰথম কুৱেইট ভ্ৰমণ। এই ভ্ৰমণে দুয়োখন দেশৰ গভীৰ ঐতিহাসিক আৰু কূটনৈতিক সম্পৰ্কক নতুন শিখৰলৈ লৈ যাব বুলি আশা কৰা হৈছে।
উল্লেখ্য যে শেষবাৰৰ বাবে ১৯৮১ চনত ইন্দিৰা গান্ধীয়ে প্ৰধানমন্ত্ৰীৰূপে কুৱেইট ভ্ৰমণ কৰিছিল।
