ভাৰতৰ প্ৰধানমন্ত্ৰী নৰেন্দ্ৰ মোদীয়ে শনিবাৰে (৩০ আগষ্ট, ২০২৫) ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিৰ সৈতে ফোনযোগে বাৰ্তালাপ কৰে। তেওঁ ইউক্ৰেইনৰ সংঘাতৰ শান্তিপূৰ্ণ সমাধানৰ বাবে সকলো ধৰণৰ সহায় আগবঢ়াবলৈ ভাৰতৰ প্ৰতিশ্ৰুতি প্ৰকাশ কৰে।
প্ৰধানমন্ত্ৰী মোদীয়ে ছ’চিয়েল মিডিয়া প্লেটফৰ্ম এক্সযোগে এটা পোষ্ট শ্বেয়াৰ কৰি কয়, ‘আজি ৰাষ্ট্ৰপতি জেলেনস্কিয়ে কৰা ফোন কলৰ বাবে ধন্যবাদ। চলি থকা সংঘাত, ইয়াৰ মানৱীয় দিশ, শান্তি আৰু স্থিতিশীলতা পুনৰুদ্ধাৰৰ প্ৰচেষ্টাৰ ওপৰত আমি মত বিনিময় কৰিলো। এই দিশত কৰা সকলো প্ৰচেষ্টা ভাৰতে সম্পূৰ্ণৰূপে সমৰ্থন কৰে।
ইফালে ইউক্ৰেইনৰ ৰাষ্ট্ৰপতি জেলেনস্কিয়েও সামাজিক মাধ্যমৰ জৰিয়তে ভাৰতৰ প্ৰধানমন্ত্ৰী নৰেন্দ্ৰ মোদীৰ সৈতে বাৰ্তালাপ কৰা বুলি উল্লেখ কৰে।
প্ৰধানমন্ত্ৰীৰ কাৰ্যালয়ে প্ৰকাশ কৰা এক বিবৃতিত কোৱা হৈছে যে ভাৰত আৰু ইউক্ৰেইনৰ শীৰ্ষ নেতা দুগৰাকীয়ে দুয়োখন দেশৰ অংশীদাৰিত্বৰ অগ্ৰগতিৰ পৰ্যালোচনা কৰি পাৰস্পৰিক স্বাৰ্থৰ সকলো ক্ষেত্ৰতে সহযোগিতা বৃদ্ধিৰ উপায়ৰ বিষয়ে আলোচনা কৰে।
উল্লেখ্য যে সাংহাই সহযোগিতা সংস্থাৰ শীৰ্ষৰ সন্মিলনৰ বাবে চীনত উপস্থিত হোৱাৰ সময়তে প্ৰধানমন্ত্ৰী মোদীৰ সৈতে ইউক্ৰেইনৰ ৰাষ্ট্ৰপতি জেলেনস্কিৰ বাৰ্তালাপে যথেষ্ট চৰ্চাৰ বিষয় হৈ পৰিছে। এই শীৰ্ষ সন্মিলনতেই ভাৰতৰ প্ৰধানমন্ত্ৰী মোদীৰ সৈতে ৰাছিয়াৰ ৰাষ্ট্ৰপতি পুটিনে দ্বিপাক্ষিক আলোচনাত মিলিত হ’ব।
