অহা ৮ ছেপ্তেম্বৰত অসম ভ্ৰমণলৈ আহিব প্ৰধানমন্ত্ৰী নৰেন্দ্ৰ মোদী। ‘ভাৰত ৰত্ন’ ড০ ভূপেন হাজৰিকাৰ জন্ম শতবার্ষিকী উদযাপনৰ বছৰজোৰা কাৰ্যসূচীৰ শুভাৰম্ভৰ বাবে প্ৰধানমন্ত্ৰী মোদী অসমলৈ আহিব বুলি জানিব দিয়ে মুখ্যমন্ত্ৰী হিমন্ত বিশ্ব শৰ্মাই।
এই ভ্ৰমণৰ সময়ত প্ৰধানমন্ত্ৰীগৰাকীয়ে প্ৰথমে গোলাঘাট জিলাৰ নুমলীগড় শোধনাগাৰ লিমিটেডত উপস্থিত হৈ ৪২০০ কোটি টকা ব্যয়ৰে স্থাপন কৰা বায়’-ইথানল প্লাণ্টটো দেশৰ বাবে উৎসৰ্গা কৰিব।
এই কাৰ্যসূচীৰ পিছত প্ৰধানমন্ত্ৰী মোদী দৰং জিলাৰ মঙলদৈত উপস্থিত হৈ গুৱাহাটীৰ কুৰুৱা আৰু নাৰেংগী সংযোগী ব্ৰহ্মপুত্ৰৰ ওপৰত গুৱাহাটী-ৰিং ৰোড উন্মোচন কৰাৰ লগতে মঙলদৈ চিকিৎসা মহাবিদ্যালয় হাস্পতালৰ আধাৰশিলা স্থাপন কৰিব।
এই দুটা কাৰ্যসূচীৰ পিছত সন্ধিয়া তেওঁ উপস্থিত হ’ব গুৱাহাটীত। গুৱাহাটীত তেওঁ ড০ ভূপেন হাজৰিকাৰ জন্ম শতবাৰ্ষিকী উদযাপনৰ শুভাৰম্ভ কৰিব। প্ৰধানমন্ত্ৰীৰ দিনজোৰা কাৰ্যসূচীৰ বিষয়ে জানিব দিয়ে মুখ্যমন্ত্ৰী ড০ হিমন্ত বিশ্ব শৰ্মাই।
