সাংহাই সহযোগিতা সংস্থাৰ শীৰ্ষ সন্মিলনত অংশ লোৱাৰ উদ্দেশ্যে শনিবাৰে চীনত উপস্থিত হয় প্ৰধানমন্ত্ৰী নৰেন্দ্ৰ মোদী। এই সন্মিলনত অংশ লোৱাৰ সমান্তৰালকৈ প্ৰধানমন্ত্ৰী মোদীয়ে চীনৰ ৰাষ্ট্ৰপতি জিনপিং আৰু ৰাছিয়াৰ ৰাষ্ট্ৰপতি ভ্লাডিমিৰ পুটিনৰ সৈতেও দ্বিপাক্ষিক আলোচনাত মিলিত হ’ব।
প্ৰধানমন্ত্ৰী মোদীয়ে জাপান ভ্ৰমণ সামৰি আজি বিয়লি চীনৰ টিয়ানজিনত উপস্থিত হয়। চীনত উপস্থিত হোৱাৰ লগে লগে প্ৰধানমন্ত্ৰী মোদীক ৰঙা দলিচা পাৰি উষ্ম আদৰণি জনায়।
১ ছেপ্তেম্বৰলৈকে চীন ভ্ৰমণত ব্যস্ত থাকিবলগীয়া মোদীয়ে চীনৰ ৰাষ্ট্ৰপতি জিনপিঙৰ সৈতে দুয়োখন দেশৰ মাজৰ সম্পৰ্ক আৰু অধিক দৃঢ় কৰাৰ সন্দৰ্ভত আলোচনাত মিলিত হ’ব।
৩১ আগষ্টৰ পৰা ১ ছেপ্তেম্বৰলৈকে চীনৰ টিয়ানজিনত এছ চি অ’ বৈঠক অনুষ্ঠিত হ’ব। এই সন্মিলনত ২০খনৰো অধিক দেশৰ শীৰ্ষ নেতাই অংশ ল’ব। ২০২৪ চনৰ অক্টোবৰ মাহত ৰাছিয়াত অনুষ্ঠিত হোৱা ব্ৰিকছ সন্মিলনৰ সময়ত প্ৰধানমন্ত্ৰী মোদী আৰু চীনৰ ৰাষ্ট্ৰপতি ছি জিনপিঙৰ আছিল শেষ সাক্ষাৎ।
উল্লেখ্য যে, ২০২০ চনত চীনৰ সেনাৰ সৈতে গলৱান ঘাটিত হোৱা সংঘৰ্ষৰ পিছত এইটোৱে হ’ব প্ৰধানমন্ত্ৰী মোদীৰ প্ৰথমটো চীন ভ্ৰমণ। অৰ্থাত ৭ বছৰৰ মূৰত প্ৰধানমন্ত্ৰী মোদীয়ে চীনৰ ভূমিত উপস্থিত হৈছে।
