শনিবাৰে প্ৰধানমন্ত্ৰী নৰেন্দ্ৰ মোদীয়ে আন্তৰ্জাতিক মহাকাশ কেন্দ্ৰলৈ যোৱা ভাৰতীয় মহাকাশচাৰী শুভাংশু শুক্লাৰ সৈতে বাৰ্তালাপ কৰে। প্ৰধানমন্ত্ৰী মোদীয়ে নমস্কাৰ জনাই শুক্লাৰ সৈতে বাৰ্তালাপ আৰম্ভ কৰে।
তেওঁ কয় যে আজি আপুনি ভাৰতৰ পৰা দূৰত আছে, কিন্তু ভাৰতবাসীৰ আশীৰ্বাদ আপোনাৰ লগত আছে।
প্ৰধানমন্ত্ৰীয়ে লগতে কয় যে আপোনাৰ নামত শুভ আছে, আপোনাৰ যাত্ৰাও এক নতুন যুগৰ শুভাৰম্ভণি। মহাকাশত ভাৰতৰ পতাকা উৰুওৱাৰ বাবে আন্তৰিক শুভেচ্ছা জনালো।
ইয়াৰ উপৰি প্ৰধানমন্ত্ৰী মোদীয়ে মহাকাশত সকলো ঠিকেই আছেনে? স্বাস্থ্য ভালে আছেনে বুলিও কৰা প্ৰশ্নৰ উত্তৰত শুক্লাই কয় যে ভাৰতীয়ৰ শুভকামনাত মই ইয়াত ভালেই আছো।
শুক্লাই কয় যে সৰুতে মই কেতিয়াও ভবা নাছিলো যে মই কেতিয়াবা মহাকাশত উপনীত হ’ম। আজি আপোনাৰ (প্ৰধানমন্ত্ৰী মোদীৰ) নেতৃত্বত আজিৰ ভাৰতে মোক মোৰ সপোন বাস্তৱায়িত কৰাৰ সুযোগ দিয়ে। ইয়াৰ বাবেই মই দেশক প্ৰতিনিধিত্ব কৰিবলৈ সক্ষম হৈছো।
প্ৰধানমন্ত্ৰী মোদীয়ে আৰু কয় যে মোৰ অভ্যাস যে যেতিয়াই কাৰোবাক লগ পাওঁ তেতিয়াই তেওঁক হোমৱৰ্কো দিওঁ। প্ৰধানমন্ত্ৰী মোদীয়ে শুভাংশুক কয় যে আপোনাৰ হোমৱৰ্ক হৈছে যে আপুনি লাভ কৰা অভিজ্ঞতাৰ জৰিয়তে গগণযানক আগুৱাই লৈ গৈ চন্দ্ৰত অৱতৰণ কৰিব লাগিব।
এই সন্দৰ্ভত শুভাংশুৱে কয় যে মই ইয়াত যি অভিজ্ঞতা পাইছো সেয়া অতি মূল্যৱান। মই যেতিয়া ঘূৰি আহিম তেতিয়া নিশ্চিতভাৱে গগণযানকে ধৰি আন আন মিছনবোৰক আগুৱাই নিয়াৰ বাবে দৃঢ়তাৰে কাম কৰিম।
