প্ৰচাৰ ভাৰতীয়ে অসম চৰকাৰৰ সহযোগত আহোম সাম্ৰাজ্যৰ শ্ৰেষ্ঠ সেনাপতি লাচিত বৰফুকনক লৈ নিৰ্মাণ কৰা হ’ব ৫২টা খণ্ডৰ এখন টিভি ধাৰাবাহিক।
আকাশবাণী, দূৰদৰ্শন, আৰু ইয়াৰ ডিজিটেল সেৱা প্ৰচাৰ ভাৰতী নিউজ চাৰ্ভিচেছ (পিবিএনএছ)কে ধৰি প্ৰচাৰ ভাৰতীৰ সকলো প্লেটফৰ্মতে সম্প্ৰচাৰিত হ’ব এই ধাৰাবাহিকখন।
এই সন্দৰ্ভত আজি অসমৰ মুখ্যমন্ত্ৰী ড০ হিমন্ত বিশ্ব শৰ্মা আৰু দূৰদৰ্শনৰ সঞ্চালক প্ৰধান কাঞ্চন প্ৰসাদৰ উপস্থিতিত অসম চৰকাৰৰ সাংস্কৃতিক পৰিক্ৰমা সঞ্চালক মীনাক্ষী দাস নাথ আৰু প্ৰচাৰ ভাৰতীৰ উপ-সঞ্চালক প্ৰধান (কন্টেন্ট ছ’ৰ্চিং) অমিত কুমাৰৰ উপস্থিতিত এক বুজাবুজি চুক্তি স্বাক্ষৰ হয়।
চুক্তি স্বাক্ষৰৰ পিছত মুখ্যমন্ত্ৰী ড০ হিমন্ত বিশ্ব শৰ্মাই কয় যে অসমৰ জনসাধাৰণৰ বাবে এইটো এটা ঐতিহাসিক দিন আৰু ই এক উল্লেখযোগ্য মাইলৰ খুঁটি হিচাপে চিহ্নিত হ’ব। কাৰণ অসম চৰকাৰে প্ৰথমবাৰৰ বাবে প্ৰচাৰ ভাৰতীৰ সহযোগত কিংবদন্তি লাচিত বৰফুকনৰ ওপৰত এখন তথ্যচিত্ৰ নিৰ্মাণৰ উদ্যোগ লৈছে। এই তথ্যচিত্ৰখন দেশজুৰি সম্প্ৰচাৰিত হ’ব আৰু ইয়াৰ জৰিয়তে লাচিত বৰফুকনৰ বিক্ৰম দেখিবলৈ পাব।
চুক্তি স্বাক্ষৰ কাৰ্যসূচীত অসম চৰকাৰৰ সাংস্কৃতিক পৰিক্ৰমা মন্ত্ৰী বিমল বৰা, অসমৰ মুখ্য সচিব ৰবি কোটা, অসম চৰকাৰৰ সাংস্কৃতিক পৰিক্ৰমা বিভাগৰ প্ৰধান সচিবকে ধৰি আন কেইবাজনো গণ্য মান্য ব্যক্তি উপস্থিত থাকে।
