ভাৰত আৰু নিউজিলেণ্ডৰ তিনিখন মেচৰ টেষ্ট শৃংখলাৰ তৃতীয় তথা অন্তিমখন টেষ্ট মুম্বাইৰ ৱাংখেড়ে ষ্টেডিয়ামত অনুষ্ঠিত হৈ আছে। দ্বিতীয় দিনৰ খেলৰ অন্তত শক্তিশালী স্থিতিত আছে ভাৰত।
এই মেচখনত টিম ইণ্ডিয়াৰ অফ স্পিনাৰ আৰ অশ্বিনে এক বিশেষ অভিলেখ গঢ়িবলৈ সক্ষম হৈছে। কেইবাটাও অভিলেখ গঢ়া অশ্বিনে এইবাৰ কিংবদন্তি অনিল কুম্বলেৰ নামত থকা ১৮ বছৰীয়া অভিলেখ ভংগ কৰিলে। নিউজিলেণ্ডৰ দ্বিতীয় ইনিংছত এটা উইকেট দখল কৰাৰ লগে লগে তেওঁ এই বিশেষ মাইলৰ খুঁটি অৰ্জন কৰে।
দিনটোৰ খেলৰ শেষলৈকে অশ্বিনে ৩টা উইকেট দখল কৰিছিল, আনহাতে প্ৰথম ইনিংছত তেওঁ লাভ কৰা নাছিল সফলতা।
এই মেচখনৰ সময়তে ৱাংখেড়ে ষ্টেডিয়ামত সৰ্বাধিক উইকেট দখল কৰা ভাৰতীয় বলাৰ হিচাপে পৰিগণিত হয় অশ্বিন। এই ক্ষেত্ৰত তেওঁ অতিক্ৰম কৰে মহান স্পিনাৰ অনিল কুম্বলেক।
ৱাংখেড়ে ষ্টেডিয়ামত অশ্বিনৰ নামত আছে ৬খন মেচত ৪১টা উইকেট। নিউজিলেণ্ডৰ দ্বিতীয় ইনিংছত অশ্বিনে তিনিটা উইকেট দখল কৰাৰ লগে লগে অনিল কুম্বলেৰ নামত থকা ৩৮টা উইকেটৰ অভিলেখ ভংগ কৰে। কুম্বলেই ৭খন মেচত ৩৮টা উইকেট দখল কৰিছিল।
ৱাংখেড়েত সৰ্বাধিক টেষ্ট উইকেট দখল কৰা বলাৰ
আৰ অশ্বিন – ৪১
অনিল কুম্বলে – ৩৮
কপিল দেৱ – ২৮
হৰভজন সিং – ২৪
উল্লেখ্য যে, তৃতীয় টেষ্টৰ দ্বিতীয় দিনা বাওঁহতীয়া স্পিনাৰ ৰবীন্দ্ৰ জাদেজাই ৫২ ৰানত ৪ উইকেট আৰু অফ স্পিনাৰ আৰ অশ্বিনে ৬৩ ৰানত ৩ উইকেট দখল কৰে। এই দুয়োগৰাকীৰ উৎকৃষ্ট প্ৰদৰ্শনে ভাৰতৰ অন্তিমখন টেষ্ট মেচত নিউজিলেণ্ডৰ বিৰুদ্ধে জয়ী হোৱাৰ আশা পুনৰ সজীৱ কৰি তুলিলে।
নিউজিলেণ্ডে দ্বিতীয় ইনিংছত দ্বিতীয় দিনাৰ অন্তত ৯ উইকেটত ১৭১ ৰান সংগ্ৰহ কৰি ১৪৩ ৰানৰ অগ্ৰগতি লাভ কৰিছে। ইয়াৰ পূৰ্বে শুভমন গিল (৯০), ৱাশ্বিংটন সুন্দৰ (৩৮ নট আউট), ঋষভ পন্ত (৬০)ৰ সহায়ত ভাৰতে প্ৰথম ইনিংছত ২৬৩ ৰান সংগ্ৰহ কৰি ২৮ ৰানৰ অগ্ৰগতি প্ৰদান কৰে। নিউজিলেণ্ডে প্ৰথম ইনিংছত ২৩৫ ৰান সংগ্ৰহ কৰিছিল।
