কংগ্ৰেছৰ জ্যেষ্ঠ নেতা তথা সাংসদ ৰাহুল গান্ধীৰ এটা ভিডিঅ’ তীব্ৰ ৰূপত ভাইৰেল হৈ আছে ছ’চিয়েল মিডিয়াত। ভিডিঅ’টোত ৰাহুল গান্ধীয়ে আমেৰিকাৰ ব্ৰাউন ইউনিভাৰ্চিটিত অনুষ্ঠিত এটা কাৰ্যসূচীত শিক্ষাৰ্থীসকলৰ সৈতে মত বিনিময় কৰি থকা পৰিলক্ষিত হয়।
এই অনুষ্ঠানত ৰাহুল গান্ধীক এজন শিখ ধৰ্মালম্বী ছাত্ৰই ১৯৮৪ চনৰ শিখ বিৰোধী অভিযান সন্দৰ্ভত কৰে কিছু প্ৰশ্ন।
ছাত্ৰজনে ৰাহুল গান্ধীক সোধে, ‘আপুনি কৈছে যে ৰাজনীতি নিৰ্ভীক হ’ব লাগে, ভয় কৰিবলগীয়া একো থাকিব নালাগে, কিন্তু আমি কেৱল কড়া পিন্ধিব নিবিচাৰো, কেৱল পাগুৰি বান্ধিব নিবিচাৰো, মত প্ৰকাশৰ স্বাধীনতা বিচাৰো, যিটো কংগ্ৰেছ দলৰ শাসনত নাছিল।’
লগতে কংগ্ৰেছে শিখ লোকৰ কণ্ঠক আওকাণ কৰি ১৯৮৪ চনৰ সংঘৰ্ষত অভিযুক্ত সজ্জন কুমাৰৰ দৰে লোকক ৰক্ষণা বেক্ষণ দিয়াৰো গুৰুতৰ অভিযোগ উত্থাপন কৰে ছাত্ৰজনে।
এই সন্দৰ্ভত ৰাহুল গান্ধীয়ে কয় যে সেই সময়ত দলে বহু ভুল কৰিছিল, কিন্তু মই সেই সময়ত দলত নাছিলো। কংগ্ৰেছ দলৰ ইতিহাসত হোৱা প্ৰতিটো ভুলৰ দায়িত্ব ল’বলৈ তেওঁ সাজু বুলিও কয়।
ৰাহুল গান্ধীয়ে আৰু কয়, ‘মই ৰাজহুৱাভাৱে কৈছো যে ৮০ৰ দশকত যি হৈছিল সেয়া ভুল আছিল। মই বহুবাৰ স্বৰ্ণ মন্দিৰলৈ গৈছো। ভাৰতৰ শিখ সম্প্ৰদায়ৰ সৈতে মোৰ অতি ভাল সম্পৰ্ক আছে।’
ইফালে বিজেপিৰ আই টি চেলৰ মুৰব্বী অমিত মালব্যই এটা ভিডিঅ’ শ্বেয়াৰ কৰি ৰাহুল গান্ধীক কটাক্ষ কৰা দেখা যায়। ভাৰতৰ লগতে আন্তঃৰাষ্ট্ৰীয় মঞ্চতো ৰাহুল গান্ধীয়ে সমালোচনাৰ সন্মুখীন হয় বুলি কটাক্ষ কৰে বিজেপি নেতাগৰাকীয়ে।
