ৰাজস্থানৰ উদয়পুৰৰ পৰা আহিছে এটা ডাঙৰ খবৰ। ৰাজ্যখনৰ ৰাজসমন্দ সমষ্টিৰ পৰা বিজেপিৰ বিধায়ক দীপ্তি মহেশ্বৰী ভয়ংকৰ দুৰ্ঘটনাত পতিত হৈছে। শুকুৰবাৰে গভীৰ নিশা সংঘটিত হোৱা এই দুৰ্ঘটনাটোত গুৰুতৰভাৱে আহত হৈছে বিধায়িকাগৰাকী।
সম্প্ৰতি সংকটজনক অৱস্থাত উদয়পুৰৰ এখন হাস্পতালৰ আই চি ইউত ভৰ্তি কৰোৱা হৈছে, য’ত তেওঁৰ চিকিৎসা চলি আছে। তথ্য অনুসৰি শুকুৰবাৰে গভীৰ নিশা ৰাজসমন্দৰ পৰা উদয়পুৰলৈ আহি থকা সময়তে আম্বেৰিৰ সমীপত বিধায়িকাগৰাকীৰ গাড়ীখন আন এখন গাড়ীৰ সৈতে খুন্দা মাৰে।
সংঘৰ্ষটো ইমানেই ভয়াৱহ আছিল যে বিধায়িকাগৰাকীৰ গাড়ীখনে নিয়ন্ত্ৰণ হেৰুৱাই পথৰ কাষত থকা পাহাৰত খুন্দা মাৰে।
এই দুৰ্ঘটনাটোত বিধায়িকা দীপ্তি মহেশ্বৰীয়ে হাত-ভৰিৰ লগতে শৰীৰৰ আন অংশত গুৰুতৰভাৱে আঘাত পাইছে। দুৰ্ঘটনাৰ সময়ত গাড়ীখনত থকা তেওঁৰ ব্যক্তিগত সহায়ক আৰু গাড়ী চালকজনো মূৰত আঘাতপ্ৰাপ্ত হয়।
দুৰ্ঘটনা সংঘটিত হোৱাৰ লগে লগে ওচৰতে উপস্থিত থকা লোকসকলে সহায় কৰে আৰু ব্যক্তিগত বাহনৰ সহায়ত আটাইকেইজন আহতক চিকিৎসালয়লৈ লৈ যোৱা হয়।
