ৰাজ্যত বৰ্তমানেও যেন সুৰক্ষিত নহয় যুৱতী-মহিলা। এইবাৰ ই-ৰিক্সা চালকৰ কামনাৰ বলি হয় এগৰাকী ২৪বছৰীয়া যুৱতী।
এই চাঞ্চল্যকৰ ঘটনা সংঘটিত হৈছে ৰঙিয়াত। এজনে ই-ৰিক্সা চালকে ৰঙিয়াৰ পৰা নিজ গৃহলৈ গৈ থকা অৱস্থাত নিৰ্জন ঠাইত সংঘটিত হয় এই ঘটনা। নিশা অন্ধকাৰৰ সুযোগ লৈ এগৰাকী যুৱতীৰ শ্লীলতা হানিৰ চেষ্টা চলাই এইজন লম্পট ই-ৰিক্সা চালকে।
ঘটনা বিবৰণ অনুসৰি, যুৱতীগৰাকীয়ে ৰঙিয়াৰ কৰ্মস্থলীৰ পৰা অকলশৰে ই-ৰিক্সা এখনত উঠি নিজ গৃহ ইচ্চাদঘৰীয়ালৈ গৈ আছিল। অকলশৰীয়া যুৱতী যাত্ৰীগৰাকীক দেখি ৰ’ব নোৱাৰিলে এইজন লম্পট ই-ৰিক্সা চালকে। চালক জনৰ নাম অনন্ত কলিতা।
উক্ত ঘটনাৰ দিনা, নিশা ৰিক্সা খনত উঠি নিজ গৃহ আহি থকা অৱস্থাতে মাজ ৰাস্তাত প্ৰস্ৰাৱ কৰিব লাগিছে বুলি নিৰ্জন পথৰ দাঁতিত ৰিক্সাখন ৰখাই অনন্তই।
ইয়াৰ পিছত পাছফালৰ পৰা মুখত গোবা মাৰি ধৰি যুৱতীগৰাকীৰ সৈতে অপকৰ্ম সংঘটিত কৰা বুলি অভিযোগ উঠে ধৃত চালক অনন্ত কলিতাৰ বিৰুদ্ধে। ইতিমধ্যে এই ৫৭বছৰীয়া লম্পট অনন্ত কলিতাৰ বিৰুদ্ধে ভুক্তভোগী যুৱতী গৰাকীয়ে ৰঙিয়া থানাত এজাহাৰ দাখিল কৰে।যুৱতী গৰাকীৰ এজাহাৰৰ ভিত্তিত ১৬ মে’ত ৰঙিয়া আৰক্ষীয়ে আটক কৰে চালক অনন্ত কলিতাক।
ইতিমধ্যে এই ঘটনাৰ উচিত তদন্তৰ দাবী জনাইছে যুৱতীগৰাকীৰ পৰিয়ালবৰ্গই।
