সোণ সৰবৰাহৰ গোচৰত গ্ৰেপ্তাৰ হোৱা অভিনেত্ৰী ৰান্যা ৰাওৰ বিস্ফোৰক স্বীকাৰোক্তি। ৰাষ্ট্ৰীয় সংবাদ মাধ্যমত প্ৰকাশ পোৱা প্ৰতিবেদন অনুসৰি তেওঁ প্ৰথমবাৰৰ বাবে সোণ সৰবৰাহ কৰিছিল আৰু সোণ লুকুৱাই অনাৰ আদব-কায়দা ইউটিউবৰ পৰা শিকা বুলি উল্লেখ কৰিছে।
অভিনেত্ৰীগৰাকীয়ে ৰাজহ চোৰাংচোৱা সঞ্চালকালয়ৰ আগত এই মন্তব্য কৰিছে বুলি জানিব পৰা গৈছে। ইয়াৰ উপৰি তেওঁ সঘনাই বিদেশ ভ্ৰমণ আৰু সোণৰ চোৰাং ব্যৱসায়ৰ কথাও উল্লেখ কৰে।
প্ৰতিবেদন অনুসৰি ৰান্যা ৰাওে প্ৰথমবাৰৰ বাবে ডুবাইৰ পৰা বেংগালুৰুলৈ সোণ সৰবৰাহ কৰিছিল। ইয়াৰ পূৰ্বে তেওঁ কেতিয়াও ডুবাইৰ পৰা সোণ ক্ৰয় কৰা নাছিল।
অভিনেত্ৰীগৰাকীৰ মতে, ‘১ মাৰ্চত বিদেশী ফোন নম্বৰৰ পৰা ফোন আহিছিল। মোক ডুবাই বিমানবন্দৰৰ টাৰ্মিনেল ৩ৰ গেট এ’লৈ যাবলৈ নিৰ্দেশ দিয়া হৈছিল। মোক ডুবাই বিমানবন্দৰৰ পৰা সোণখিনি সংগ্ৰহ কৰি বেংগালুৰুত লোকজনৰ হাতত দিবলৈ কোৱা হৈছিল।’
উল্লেখ্য যে, ৩ মাৰ্চত অভিনেত্ৰী ৰাম্যা ৰাওৰ পৰা ৰাজহ চোৰাংচোৱা সঞ্চালকালয়ে কেম্পেগৌড়া আন্তঃৰাষ্ট্ৰীয় বিমান বন্দৰৰ পৰা ১২.৫৬ কোটি টকা মূল্যৰ সোণখিনি জব্দ কৰিছিল। তেওঁৰ পৰা ২.০৬ কোটি টকাৰ সোণৰ গহনা আৰু ২.৬৭ কোটি টকাৰ ভাৰতীয় মুদ্ৰাও উদ্ধাৰ কৰা হৈছে বুলি বিষয়াসকলে জানিবলৈ দিয়ে।
