আন্তঃৰাষ্ট্ৰীয় ক্ৰিকেটৰ তাৰকা স্পিনাৰ ৰাছিদ খান সন্দৰ্ভত আহিছে ডাঙৰ খবৰ। শেহতীয়াকৈ অনুষ্ঠিত হৈ যোৱা আই পি এলত শোচনীয় প্ৰদৰ্শন আগবঢ়োৱা আফগানিস্তানৰ স্পিনাৰগৰাকীয়ে কিছুসময়ৰ বাবে ক্ৰিকেটৰ পৰা আঁতৰি থকাৰ সিদ্ধান্ত গ্ৰহণ কৰিছে। এই খবৰে ক্ৰিকেটাৰগৰাকীৰ অনুৰাগীৰ মাজত যথেষ্ট প্ৰতিক্ৰিয়া তথা কৌতুহলৰ সৃষ্টি কৰিছে।
ৰাছিদ খানে আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ চিন্তা চৰ্চা কৰিছে নেকি বুলিও ছ’চিয়েল মিডিয়াৰ জৰিয়তে বহুতো অনুৰাগীয়ে উদ্বেগ প্ৰকাশ কৰিছে।
উল্লেখ্য যে, ১৩ জুন অৰ্থাত শুকুৰবাৰৰ পৰা আমেৰিকাত আৰম্ভ হ’ব মেজৰ লীগ ক্ৰিকেট। এই টুৰ্ণামেণ্টখনৰ আগন্তুক ছিজনত ৰাছিদ খানে অংশগ্ৰহণ নকৰাৰ সিদ্ধান্ত গ্ৰহণ কৰিছে। ৰাছিদ খানৰ অনুপস্থিতি এম আই নিউয়ৰ্ক দলে বাৰুকৈয়ে অনুভৱ কৰিব।
বিগত বৰ্ষৰ ছিজনত ৰাছিদ খানে সুন্দৰ প্ৰদৰ্শন আগবঢ়াই ৬.১৫ ইক’নমি ৰেটৰ সহায়ত ১০টা উইকেট দখল কৰিছিল। কিন্তু শেহতীয়াকৈ অনুষ্ঠিত হৈ যোৱা আই পি এলত দেখুওৱা নিৰাশাজনক প্ৰদৰ্শনৰ বাবে যথেষ্ট সমালোচনা সন্মুখীন হৈছিল আৰু সেয়ে তেওঁ কিছু সময়ৰ বাবে ক্ৰিকেটৰ পৰা আঁতৰি থকাৰ সিদ্ধান্ত লোৱা বুলি জানিব পৰা গৈছে।
