আই পি এৰ আগন্তুক ছিজনৰ বাবে ৰয়েল চেলেঞ্জাৰ্ছ বেংগালুৰুৱে ঘোষণা কৰিলে অধিনায়কৰ নাম। বৃহস্পতিবাৰে ঘোষণা কৰা অনুসৰি পৰৱৰ্তী ছিজনত আৰ চি বিক নেতৃত্ব প্ৰদান কৰিব ৰজত পাটিদাৰে। দলটোৰ ফ্ৰেঞ্চাইজিয়ে এক বিশেষ অনুষ্ঠানৰ জৰিয়তে পাটিদাৰৰ নাম ঘোষণা কৰে।
২০২১ চনত আৰ চি বিৰ হৈ আইপিএলত অভিষেক ঘটিছিল পাটিদাৰৰ। তেওঁ এই পৰ্যন্ত আই পি এলৰ ২৭খন মেচ খেলি ৭৯৯ ৰান সংগ্ৰহ কৰিছে। এই সময়ছোৱাত তেওঁৰ গড় আছিল ৩৪.৭৪ আৰু ষ্ট্ৰাইক ৰেট আছিল ১৫৮.৮৫।
ঘৰুৱা ক্ৰিকেটত মধ্যপ্ৰদেশ দলক নেতৃত্ব প্ৰদান কৰাৰ অভিজ্ঞতা আছে পাটিদাৰৰ।
উল্লেখ্য যে, দক্ষিণ আফ্ৰিকাৰ প্ৰাক্তন ক্ৰিকেটাৰ ফাফ ডু প্লেছিছে বিগত তিনিটা ছিজনত আৰ চি বিক নেতৃত্ব প্ৰদান কৰিছিল যদিও এইবাৰৰ মেগা নিলামৰ পূৰ্বে ফ্ৰেঞ্চাইজিটোৱে ডু প্লেছিছক মুকলি কৰি দিছিল।
ডু প্লেছিছক মুকলি কৰি দিয়াৰ পিছৰে পৰা চৰ্চা চলিছিল কোন হ’ব আৰ চি বিৰ পৰৱৰ্তী অধিনায়ক। দলটোৰ অনুৰাগী তথা বহু অভিজ্ঞ ক্ৰিকেট বিশ্লেষকে দলটোৰ নেতৃত্ব পুনৰবাৰ বিৰাট কোহলীয়ে ল’ব লাগে বুলি দাবী কৰিছিল। কিন্তু কোহলীয়ে অধিনায়কৰ দায়িত্ব গ্ৰহণ কৰিবলৈ আগ্ৰহ প্ৰকাশ নকৰাত অৱশেষত দলটোৱে প্ৰতিভাধৰ ক্ৰিকেটাৰ ৰজত পাটিদাৰকে নেতৃত্বৰ দায়িত্ব দিয়াৰ সিদ্ধান্ত গ্ৰহণ কৰে।
