আই পি এলৰ চলিত ছিজনৰ প্ৰথমখন কোৱালিফায়াৰ মেচত আজি মুখামুখি হ’ব ৰয়েল চেলেঞ্জাৰ্ছ বাংগালুৰু আৰু পঞ্জাৱ কিংছ। পইণ্ট তালিকাৰ শীৰ্ষ স্থানত আছে পঞ্জাৱ কিংছ আৰু দ্বিতীয় স্থানত আছে ৰয়েল চেলেঞ্জাৰ্ছ বাংগালুৰু।
২০১৬ চনৰ পৰা আই পি এলৰ ফাইনেলত প্ৰৱেশ কৰিব পৰা নাই আৰ চি বি। এই দলটোৱে খিতাপ দখলৰ পৰাও বঞ্চিত হৈ আছে। ১৭ বছৰীয়া প্ৰতিক্ষাৰ অন্ত পেলাই প্ৰথমবাৰৰ বাবে খিতাপ দখলৰ সুৱৰ্ণ সুযোগ আৰ চি বিৰ হাতত।
কিন্তু আই পি এলত এনেকুৱা এক নিয়ম আছে যাৰ বাবে আৰ চি বি আৰু দলটোৰ সমৰ্থকৰ স্বপ্ন ভংগ হোৱাৰো সম্ভাৱনা আছে।
উল্লেখ্য যে, যদি বৰষুণৰ বাবে বা আন কোনো কাৰণত পঞ্জাৱ-বাংগালুৰুৰ মেচখন বাতিল হয়, তেন্তে ৰয়েল চেলেঞ্জাৰছ বাংগালুৰু বিপদত পৰিব পাৰে।
আই পি এলৰ নিয়ম অনুসৰি যদিহে প্ৰথমখন কোৱালিফায়াৰ মেচ বাতিল হয়, তেন্তে পইণ্ট টেবুলত নেট ৰান ৰেট উন্নত দলটোৱে পোনে পোনে ফাইনেলত প্ৰৱেশ কৰিব। যদিহে আজিৰ মেচখনো বাতিল হয় তেন্তে চলিত ছিজনৰ পইণ্ট তালিকাৰ নেট ৰান ৰেটৰ শীৰ্ষত থকা পঞ্জাব কিংছে ফাইনেলৰ বাবে যোগ্যতা অৰ্জন কৰিব।
আৰচিবি আৰু পঞ্জাৱ দুয়োটা দলেই ১৯-১৯ পইণ্ট লাভ কৰিছিল যদিও নেট ৰান ৰেটৰ বাবে পঞ্জাৱ (+০.৩৭২) বাংগালুৰুতকৈ (+০.৩০১) আগত আছে।
এনে পৰিস্থিতিত ৰয়েল চেলেঞ্জাৰ্ছ বাংগালুৰুৰ চেম্পিয়ন হোৱাৰ সপোন ভংগ হ’ব পাৰে যদিও ফাইনেলত প্ৰৱেশৰ আশা সম্পূৰ্ণৰূপে শেষ নহ’ব। কোৱালিফায়াৰ মেচ বাতিল হ’লে পঞ্জাব পোনপটীয়াকৈ ফাইনেলত প্ৰৱেশ কৰিব। আনহাতে, পইণ্ট তালিকাৰ শীৰ্ষ ২ স্থানত থকাৰ বাবে আৰ চি বিয়ে ফাইনেলত প্ৰৱেশৰ দ্বিতীয়টো সুযোগ লাভ কৰিব।
পঞ্জাৱৰ বিৰুদ্ধে পৰাস্ত হ’লে এলিমিনেটৰ মেচত জয়ী হোৱা দলটোৰ মুখামুখি হ’ব আৰ চি বি আৰু সেই মেচখনৰ বিজয়ী দলটোৱে ফাইনেলত প্ৰৱেশ কৰিব। প্ৰথমখন এলিমিনেটৰ মেচত মুখামুখি হ’ব গুজৰাট টাইটানছ আৰু মুম্বাই ইণ্ডিয়ানছ।
