বিহাৰৰ গয়াত প্ৰায় ১৩ হাজাৰ কোটি টকাৰ কেইবাটাও উন্নয়নমূলক প্ৰকল্পৰ আধাৰশিলা আৰু উদ্বোধন কৰাৰ পিছত প্ৰধানমন্ত্ৰী নৰেন্দ্ৰ মোদীয়ে পশ্চিমবংগত উপস্থিত হয়। ইয়াত ৰাজধানী কলকাতাত কোটি কোটি টকা ব্যয়ৰে নিৰ্মিত মেট্ৰ’ উদ্বোধন কৰি ৰাজহুৱা সভাত ভাষণ দিয়ে।
ভাষণৰ সময়ত প্ৰধানমন্ত্ৰী মোদীয়ে কয়, ‘যি সময়ত দুৰ্গা পূজাৰ প্ৰস্তুতি আৰম্ভ হৈছে, সেই সময়ত মই কলকাতালৈ আহিছো। নতুন ৰঙেৰে আৰু নতুন স্পন্দনেৰে সজাই তোলা হৈছে কলকাতা। যেতিয়া উন্নয়নৰ উৎসৱটো বিশ্বাস আৰু আনন্দৰ উৎসৱৰ সৈতে জড়িত হৈ থাকে, তেতিয়া সুখ দুগুণ হয়। ইয়াৰ পৰা অলপ দূৰৈত কলকাতা মেট্ৰ’ আৰু হাইৱেৰ সৈতে জড়িত বৃহৎ প্ৰকল্পসমূহৰ আধাৰশিলা স্থাপন কৰাৰ লগতে উদ্বোধন কৰাৰ সুযোগ পাইছো।’
এই বিশেষ উপলক্ষে প্ৰধানমন্ত্ৰী মোদীয়ে বংগক মমতা চৰকাৰক ৰাজ্যৰ পৰা উৎখাত কৰিবলৈ আহ্বান জনায়। পশ্চিম বংগৰ মমতা চৰকাৰৰ সন্দৰ্ভত তেওঁ কয় যে অপৰাধ আৰু দুৰ্নীতি টিএমচি চৰকাৰৰ পৰিচয় হৈ পৰিছে।
প্ৰধানমন্ত্ৰী মোদীয়ে কয় যে প্ৰকৃত পৰিৱৰ্তন তেতিয়াহে আহিব যেতিয়া তৃণমূল কংগ্ৰেছ শাসনৰ পৰা অপসাৰিত হ’ব।
তেওঁ লগতে কয় যে বিগত ১১ বছৰত কেন্দ্ৰৰ বিজেপি চৰকাৰে পশ্চিম বংগৰ উন্নয়নৰ বাবে ধাৰাবাহিকভাৱে প্ৰতিটো ধৰণৰ সহায় আগবঢ়াই আহিছে। কংগ্ৰেছ নেতৃত্বাধীন ইউ পি এ চৰকাৰে ১০ বছৰত বংগৰ ৰাষ্ট্ৰীয় ঘাইপথ নিৰ্মাণৰ বাবে যিমান টকা দিছিল, আমাৰ ভাৰত চৰকাৰে তাৰ ৩ গুণতকৈও অধিক ধন বংগক দিছে। বংগৰ ৰে’লৱেৰ বাজেট পূৰ্বৰ তুলনাত তিনিগুণ বৃদ্ধি কৰা বুলিও উল্লেখ কৰে প্ৰধানমন্ত্ৰীগৰাকীয়ে।
