যদি আপুনি আই পি এলৰ অনুৰাগী তেন্তে এই খবৰ আপোনাৰ বাবে অত্যন্ত জৰুৰী। আই পি এলৰ ১৮ সংখ্যক ছিজনৰ মেচসমূহ জিঅ’ চিনেমাত দেখিবলৈ পোৱা নাযাব। ৰিলায়েন্স কোম্পানী আৰু হটষ্টাৰ একত্ৰিত হ’ব, যাৰ বাবে এই পদক্ষেপ গ্ৰহণ কৰা হৈছে।
ৰয়টাৰৰ বাতৰি অনুসৰি, এতিয়াৰে পৰা আৰু জিঅ’ চিনেমাত ক্ৰিকেটৰ সকলো মেচ আৰু অন্যান্য ক্ৰীড়া অনুষ্ঠান প্ৰচাৰ কৰা নহ’ব। ইতিমধ্যে আইচিচি টুৰ্ণামেণ্টৰ আয়োজনৰ অধিকাৰ ডিজনী প্লাছ হটষ্টাৰৰ হাতত আছে।
আই পি এল ২০২৫ৰ ৰোমাঞ্চ এইবাৰ জিঅ’ চিনেমাত দেখা নাযায়। ৰিলায়েন্স কোম্পানী আৰু ডিজনী ইণ্ডিয়াৰ মাজত প্ৰায় ৭১,৪৫৫ কোটি টকাৰ চুক্তি চূড়ান্ত কৰা হৈছে। ২০২৪ চনৰ ফেব্ৰুৱাৰী মাহতেই দুয়োটা কোম্পানীৰ চুক্তি চূড়ান্ত হৈছিল।
প্ৰতিবেদন অনুসৰি জিঅ’ চিনেমাত সম্প্ৰচাৰ হোৱা সকলো ডাঙৰ ক্ৰীড়া অনুষ্ঠান এতিয়াৰে পৰা ডিজনী প্লাছ হটষ্টাৰত দেখা যাব। অৱশ্যে এই সন্দৰ্ভত এতিয়াও কোনো আনুষ্ঠানিক বিবৃতি প্ৰকাশ পোৱা নাই।
উল্লেখ্য যে বৰ্তমান জিঅ’ চিনেমাৰ হাতত আইপিএল, ইংলিচ প্ৰিমিয়াৰ লীগ আৰু প্ৰ’ কাবাডী লীগৰ আয়োজনৰ অধিকাৰ আছে। একে সময়তে ডিজনী প্লাছ হটষ্টাৰৰ হাতত আইচিচি টুৰ্ণামেণ্টৰ অধিকাৰ আছে।
কিয় এই পদক্ষেপ লোৱা হ’ল
যিহেতু ডিজনী প্লাছ হটষ্টাৰত উন্নত লাইভ ষ্ট্ৰীমিং প্ৰযুক্তি আছে, গতিকে সকলো ক্ৰীড়া অনুষ্ঠানৰ আয়োজনৰ অধিকাৰ জিঅ’ চিনেমাৰ পৰা হটষ্টাৰলৈ হস্তান্তৰ কৰা হৈছে। আন এটা দিশ হ’ল লাইভ ষ্ট্ৰীমিঙত হটষ্টাৰৰ যথেষ্ট দৰ্শক আছে। ২০২৩ চনত খেলা এদিনীয়া বিশ্বকাপৰ ফাইনেলখন একেলগে ৫.৯ কোটি অনুৰাগীয়ে হটষ্টাৰত উপভোগ কৰিছিল।
অনুমান কৰা হৈছে যে ২০২৫ চনৰ জানুৱাৰী মাহৰ ভিতৰত সকলো ক্ৰীড়া অনুষ্ঠানৰ লাইভ ষ্ট্ৰীমিং জিঅ’ চিনেমাৰ পৰা হটষ্টাৰলৈ স্থানান্তৰিত হ’ব।
নৱেম্বৰ মাহত অনুষ্ঠিত হ’ব আই পি এলৰ নিলাম
নৱেম্বৰৰ শেষৰ ফালে অনুষ্ঠিত হ’ব আই পি এল ২০২৫ৰ মেগা নিলাম। সকলো দলে ৩১ অক্টোবৰৰ ভিতৰত বিচিচিআইক ৰিটেইনড খেলুৱৈৰ তালিকা দাখিল কৰিব লাগিব।
নতুন নিয়ম অনুসৰি এইবাৰ প্ৰতিটো দলক ছয়জন খেলুৱৈক ৰিটেইনড কৰিবলৈ অনুমতি দিয়া হৈছে, ইয়াৰে এজন খেলুৱৈ আনকেপড হোৱাটো বাধ্যতামূলক।
