পশ্চিম বংগৰ বিকাশ আৰু উন্নয়নত বাধাৰ প্ৰাচীৰ হৈ আছে মমতা বেনাৰ্জী নেতৃত্বাধীন তৃণমূল চৰকাৰ। শুকুৰবাৰে পশ্চিম বংগত এখন বিশাল ৰাজহুৱা সভা সম্বোধন কৰি এই মন্তব্য কৰে প্ৰধানমন্ত্ৰী নৰেন্দ্ৰ মোদীয়ে।
মমতা বেনাৰ্জীক আক্ৰমণৰ লক্ষ্য কৰি লৈ প্ৰধানমন্ত্ৰী মোদীয়ে কয় যে পশ্চিম বংগৰ জনতাই পৰিৱৰ্তন আৰু উন্নয়ন বিচাৰিছে, কিন্তু উন্নয়নৰ সন্মুখত বাধাৰ প্ৰাচীৰ হৈ আছে ৰাজ্য চৰকাৰ।
পশ্চিম বংগৰ দুৰ্গাপূৰত অনুষ্ঠিত জনসভাত প্ৰধানমন্ত্ৰী মোদীয়ে ৰাজ্যখনৰ বাবে ৫,৪০০ কোটি টকাৰ প্ৰকল্পৰ উদ্বোধন আৰু আধাৰশিলা স্থাপন কৰে।
প্ৰধানমন্ত্ৰী মোদীয়ে তৃণমূলক পোনপটীয়াকৈ আক্ৰমণ কৰি কয়, ‘তৃণমূল চৰকাৰ বংগৰ উন্নয়নৰ সন্মুখত দেৱালৰ দৰে থিয় হৈ আছে। যিদিনা এই দেৱালখন ভাঙি যাব, সেইদিনোটৰ পৰাই বংগই বিকাশৰ গতি ল’ব।’
তেওঁ পুনৰ কয় যে ‘তৃণমূল চৰকাৰ গ’লেহে প্ৰকৃত পৰিৱৰ্তন আহিব।’
ভাষণত প্ৰধানমন্ত্ৰী মোদীয়ে নিবনুৱা সমস্যা আৰু প্ৰব্ৰজনক লৈও উদ্বেগ প্ৰকাশ কৰে। তেওঁ কয় যে এসময়ত মানুহে বংগলৈ কৰ্মসংস্থাপনৰ বাবে আহিছিল, কিন্তু আজি পৰিস্থিতি সম্পূৰ্ণৰূপে সলনি হৈছে। তেওঁ কয়, ‘আজি পশ্চিম বংগৰ যুৱক-যুৱতীসকলে সৰু সৰু চাকৰিৰ বাবে অন্য ৰাজ্যলৈ ঢাপলি মেলিবলৈ বাধ্য হৈছে।’
প্ৰধানমন্ত্ৰীয়ে পশ্চিম বংগৰ জনতাক আহ্বান জনাই কয়, ‘বিজেপিৰ হৈ আপোনালোকক অনুৰোধ জনাইছো যে এবাৰ বিজেপিক সুযোগ দিয়ক। কঠোৰ পৰিশ্ৰমী, সৎ আৰু শক্তিশালী চৰকাৰ বাছি লওক।’
