ঝাৰখণ্ডত সংঘটিত এক ভয়ংকৰ পথ দুৰ্ঘটনাত ৫ জন লোকৰ মৃত্যু হৈছে। এই ঘটনাত গুৰুতৰভাৱে আহত হৈছে আন ৩ জন লোক। ইয়াৰে এজনৰ অৱস্থা সংকটজনক। বোকাৰো জিলাৰ বোকাৰো-ৰামগড় ৰাষ্ট্ৰীয় ঘাইপথত সংঘটিত হয় এই দুৰ্ঘটনা।
দুৰ্ঘটনাটোৰ পিছত সকলোকে ওচৰৰে এখন চিকিৎসা কেন্দ্ৰলৈ লৈ যোৱা হয় যদিও চিকিৎসকে ৫জন লোকক মৃত বুলি ঘোষণা কৰে। আহত সকল চিকিৎসাধীন হৈ আছে। সামূহিক স্বাস্থ্য কেন্দ্ৰৰ চিকিৎসা বিষয়া ডাঃ ছুইটি ভগতে শনিবাৰে জনোৱা মতে, ৮ জন লোকক চিকিৎসালয়লৈ অনা হৈছিল।
ইয়াৰে পাঁচজন লোকৰ মৃত্যু হৈছে আৰু তিনিজন আঘাতপ্ৰাপ্ত হৈ চিকিৎসাধীন হৈ আছে। আহত সকলক উন্নত চিকিৎসাৰ বাবে আন হাস্পতাললৈ প্ৰেৰণ কৰা হয় আৰু ইয়াৰে এজনৰ অৱস্থা সংকটজনক।
জানিব পৰা অনুসৰি, বোকাৰো জিলাৰ কছমাৰ আৰক্ষী থানাৰ অন্তৰ্গত দান্তু গাঁৱত শুকুৰবাৰে গভীৰ নিশা এখন চাৰিচকীয়া বাহন ৰখাই থোৱা এখন ট্ৰেইলাৰত প্ৰচণ্ড জোৰত খুন্দা মাৰে। এই ঘটনাত ৰামগড় জিলা নিবাসী এটা পৰিয়ালৰে চাৰিজন সদস্যসহ পাঁচজন লোকৰ মৃত্যু হয়।
