ছিৰিয়াত বাছাৰ আল আছাদ চৰকাৰক উৎখাত কৰাৰ প্ৰায় ১০ দিন পাৰ হৈ গৈছে। ইয়াৰ পিছতেই এক ডাঙৰ তথ্য পোহৰলৈ আহিছে।
ৰাছিয়াই কেৱল সামৰিক আৰু কৌশলগত ঘাটিৰ ব্যৱস্থা কৰি ছিৰিয়াত বাছাৰ আল আছাদক সহায় কৰাই নহয়, ইয়াৰ বাবে আছাদ চৰকাৰেও বিপুল পৰিমাণৰ ধন দিছিল।
এক প্ৰতিবেদন অনুসৰি গৃহযুদ্ধৰ সময়ত ২০১৮ চনৰ পৰা ২০১৯ চনৰ ভিতৰত আছাদ চৰকাৰে মস্কোলৈ প্ৰায় ২৫ কোটি ডলাৰ (প্ৰায় ২১২০ কোটি টকা) নগদ ধন হস্তান্তৰ কৰিছিল। এই ধন হস্তান্তৰ কৰিবলৈ ডলাৰ আৰু ইউৰো ব্যৱহাৰ কৰা হৈছিল, আনহাতে এই সময়ছোৱাত ছিৰিয়া নিজেই বিদেশী মুদ্ৰাৰ সংকটৰ সন্মুখীন হৈছিল।
ৰাষ্ট্ৰীয় অস্ত্ৰ ৰপ্তানি কোম্পানী ৰ’ছ’ব’ৰ’নেক্সপ’ৰ্টৰ নিয়ন্ত্ৰণত ৰাছিয়াৰ ৰাছিয়ান ফাইনেন্সিয়েল কৰ্প’ৰেশ্যন বেংক (আৰ এফ কে)ত জমা হৈছিল এই নগদ ধন। প্ৰতিবেদন অনুসৰি, এই নগদ ধন হস্তান্তৰ সেই সময়ত কৰা হৈছিল যেতিয়া ছিৰিয়াত বাছাৰ আল আছাদৰ চৰকাৰ সম্পূৰ্ণৰূপে ৰাছিয়াৰ সামৰিক সহায়ৰ ওপৰত নিৰ্ভৰশীল আছিল।
আছাদ চৰকাৰে নগদ ধন কঢ়িয়াই কেইবাখনো বিমান ৰাছিয়ালৈ প্ৰেৰণ কৰিছে। উদাহৰণস্বৰূপে, ২০১৯ চনৰ ১৩ মে’ত নগদ ১ কোটি ডলাৰ (প্ৰায় ৮৫ কোটি) টকা লৈ এখন বিমান মস্কো পালেগৈ।
২০১৯ চনৰ ফেব্ৰুৱাৰী মাহত ছিৰিয়াৰ কেন্দ্ৰীয় বেংকে বিমানযোগে মস্কোলৈ ২ কোটি ইউৰো (প্ৰায় ১৭৮ কোটি টকা) প্ৰেৰণ কৰিছিল। ২০১৮ চনৰ মাৰ্চৰ পৰা ২০১৯ চনৰ ছেপ্টেম্বৰৰ ভিতৰত ২১খন বিমানৰ জৰিয়তে মুঠ ২৫ কোটি ডলাৰ (প্ৰায় ২১২০ কোটি টকা) প্ৰেৰণ কৰা হৈছিল। কিন্তু এই লেনদেনৰ পূৰ্বে ২০১১ চনত আৰম্ভ হোৱা গৃহযুদ্ধৰ সময়ত ছিৰিয়াই কেতিয়াও ৰাছিয়ালৈ নগদ ধন প্ৰেৰণ কৰা নাছিল।
