চলচ্চিত্ৰ জগতৰ লগত জড়িত এক ডাঙৰ খবৰ ওলাইছে। আদালতৰ নিৰ্দেশত বিখ্যাত চলচ্চিত্ৰ পৰিচালক সঞ্জয় লীলা ভাঞ্চালীৰ বিৰুদ্ধে আৰক্ষীয়ে ৰুজু কৰিছে FIR। ভাঞ্চালীৰ কোম্পানী ভাঞ্চালী প্ৰডাকচন, প্ৰডাকচন মেনেজাৰ উত্তকৰ্শ বালি আৰু অৰবিন্দ গিলৰ বিৰুদ্ধেও গুৰুতৰ ধাৰাত FIR ৰুজু কৰা হৈছে।
বিচোৱাল থানাত ৰুজু হোৱা এই গোচৰটো ভাঞ্চালীৰ বহু চৰ্চিত ছবি “লাভ এণ্ড ৱাৰ”ৰ শ্বুটিংৰ সৈতে জড়িত। প্ৰৱঞ্চনা, অপৰাধমূলক আস্থা ভংগ, ভাবুকি আৰু সংগঠিত ষড়যন্ত্ৰৰ দৰে গুৰুতৰ অভিযোগ এফআইআৰত অন্তৰ্ভুক্ত কৰা হৈছে। এই এজাহাৰ দাখিল কৰিছে ৰাধা ফিল্মছ এণ্ড হস্পিটেলিটিৰ চিইঅ’ আৰু লাইন প্ৰযোজক প্ৰতীক ৰাজ মাথুৰে। তেওঁ অভিযোগ কৰে যে ছবিখনৰ নিৰ্মাণত নিযুক্তি প্ৰক্ৰিয়া আৰু নিৰাপত্তাৰ ব্যৱস্থা সন্দৰ্ভত প্ৰৱঞ্চনা সংঘটিত হৈছে।
অভিযোগ কৰা হৈছে যে “লাভ এণ্ড ৱাৰ” ছবিখনৰ শ্বুটিঙৰ সময়ত নিযুক্তি আৰু নিৰাপত্তাৰ ব্যৱস্থাৰ সন্দৰ্ভত প্ৰৱঞ্চনা সংঘটিত হৈছিল। ইয়াৰ উপৰিও ২০২৫ চনৰ ১৭ আগষ্টত ব্যক্তিগত নিৰাপত্তাৰক্ষীৰ অসৎ আচৰণ আৰু ভাবুকিৰ ঘটনাৰ কথাও এফআইআৰত উল্লেখ আছে।
বৰ্তমান ভাঞ্চালী বা তেওঁৰ দলৰ কোনো আনুষ্ঠানিক বিবৃতি অহা নাই। মন কৰিবলগীয়া যে বহুদিনৰ মূৰত শ্বুটিঙৰ বাবে ৰাজস্থানলৈ আহিছিল ভাঞ্চালী। ইয়াৰ পূৰ্বে তেওঁৰ ছবি “পদ্মাৱত”ৰ শ্বুটিং সন্দৰ্ভত বিতৰ্কৰ সৃষ্টি হৈছিল। এতিয়া আকৌ এবাৰ সঞ্জয় লীলা ভাঞ্চালী আৰু তেওঁৰ দল ৰাজস্থানত বিতৰ্কৰ মাজত সোমাই পৰিছে।
