বিতৰ্কই লগ নেৰা হৈছে শ্ৰীমন্ত শংকৰদেৱ সংঘক। শেহতীয়াকৈ গহপুৰৰ এগৰাকী লোকে মে-ডাম-মেফিত অংশ লোৱা বাবে শংকৰ সংঘই লোকজনৰ পৰিয়ালক এঘৰীয়া কৰাৰ লগতে জৰিমনা বিহাক লৈ ৰাজ্যজুৰি চলি আছে প্ৰতিবাদ। এই প্ৰতিবাদৰ মাজতে এইবাৰ যোৰহাটত সংঘটিত হৈছে এক অনুৰূপ ঘটনা।
অৱশ্যে এইবাৰ মে-ডাম-মেফিত অংশ লোৱাৰ বাবে নহয়, কন্যা সন্তানৰ পুষ্পিতা অনুষ্ঠানত অতিথিক মাছ-মাংসৰে আপ্যায়ন কৰাৰ বাবে উত্তৰ-পূবৰ সৰ্ববৃহত ধৰ্মীয় অনুষ্ঠানৰূপে পৰিচিত শংকৰ সংঘৰ ৰোষত পৰে যোৰহাটৰ এটি পৰিয়াল।
পৰিয়ালটোক এবছৰৰ বাবে বহিষ্কৃত কৰাৰ লগতে বিগত বৰ্ষৰ ২৪ আগষ্টত পৰিয়ালটোৰ মুৰব্বী ৰাণু বৰুৱাক শ্ৰীমন্ত শংকৰদেৱ সংঘৰ তৰফৰ পৰা জনোৱা হ’ল যে এবছৰৰ বাবে তেওঁলোকৰ ঘৰত কোনো ধৰণৰ ধৰ্মীয় অনুষ্ঠান অনুষ্ঠিত কৰিব নোৱাৰিব।
শ্ৰীমন্ত শংকৰদেৱ সংঘৰ ৰংদৈ যোগনীয়া নৱ প্ৰাথমিক শাখাই এই অনুশাসনমূলক ব্যৱস্থা লোৱাৰ পিছৰে পৰা মানসিকভাৱে ভাঙি পৰিছে পৰিয়ালটোৰ মুৰব্বী ৰাণু বৰুৱাৰ লগতে আন আন সদস্যসকল।
ঘটনাৰ বিৱৰণী অনুসৰি, যোৰহাটৰ ৰাণু বৰুৱাৰ মাজু পুত্ৰ গৌতম বৰুৱা কৰ্মসূত্ৰে যোৰহাট কেন্দুগুৰিৰ বাসিন্দা। প্ৰায় সাত মাহ পূৰ্বে গৌতম বৰুৱাৰ কন্যা পুস্পিতা হোৱাৰ পাছত শংকৰ সংঘৰ নিয়ম অনুসৰি পুৰণি গৃহতেই সকলো কৰ্ম সম্পাদন কৰে।
গাঁৱৰ ঘৰত সকলো নিয়ম-নীতি পালন কৰি প্ৰায় এমাহ পাছত যোৰহাট নগৰত গৌতম বৰুৱাই বন্ধুবৰ্গৰ লগতে আত্মীয় স্বজনৰ বাবে এটি বিবাহ ভৱনত আমিষ আহাৰেৰে আপ্যায়নৰ ব্যৱস্থা কৰিছিল। কিন্তু সংঘৰ নিয়মৰ বাবেই নাতিনীৰ এই কৰ্মলৈ যোৱা নাছিল গৌতম বৰুৱাৰ মাতৃ ৰাণু বৰুৱা আৰু তেওঁৰ জ্যেষ্ঠ ভাতৃ।
গাঁৱৰ ঘৰৰ পৰা কোনো সদস্যই যোৰহাটত আয়োজন কৰা অভ্যৰ্থনা অনুষ্ঠানত উপস্থিত নথকাৰ পিছতো শংকৰ সংঘৰ ৰোষত পৰাত এতিয়া ক্ষুন্ন হৈ পৰিছে গৌতম বৰুৱাৰ পৰিয়াল।
প্ৰাথমিক, আঞ্চলিক আৰু জিলা পৰ্যায়ৰ বিষয়ববীয়ালৈ পত্ৰ প্ৰেৰণ কৰিও কোনো উত্তৰ নোপোৱাত অৱশেষত উপায়হীন হৈ কাষ চাপিছে সংবাদ মাধ্যমৰ। ভুক্তভোগী পৰিয়ালটোৱে সংবাদ মাধ্যমৰ আগত জানিবলৈ দিয়ে যে যোৰহাটত অনুষ্ঠিত হৈ যোৱা ৯৪ সংখ্যক বাৰ্ষিক অধিৱেশন যাতে সুকলমে অনুষ্ঠিত হৈ যায় তাৰ বাবেই বিগত মাহ কেইটাত শংকৰ সংঘৰ বিৰুদ্ধে একো মাত মতা নাছিল।
ইয়াৰ উপৰি শীঘ্ৰেই সংঘৰ একাংশৰ বিৰুদ্ধে পৰিয়ালটোৱে আইনী ব্যৱস্থা ল’ব বুলিও জানিবলৈ দিয়ে।
