বিশ্বৰ বিজ্ঞান জগতত অসমীয়াগিৰি। কাকপথাৰৰ কৈলাশপুৰৰ সন্তান, হাৰ্ভাৰ্ড বিশ্ববিদ্যালয়ৰ বিজ্ঞানী ড০ ৰুবুল মাউতৰ এখন গৱেষণা পত্ৰ বিশ্বৰ অন্যতম শ্ৰেষ্ঠ গৱেষণা পত্ৰিকা Cell Pressত প্ৰকাশ পাইছে।
জিন সম্পাদনাৰ দৰে জটিল বিষয়ত গৱেষণা কৰি চিকিৎসা বিজ্ঞানলৈ অতুলনীয় অৱদান আগবঢ়াইছে আই অসমীৰ সুযোগ্য সন্তান ড° ৰুবুল মাউতে।মানৱ শৰীৰৰ ৰোগ প্ৰতিৰোধ তন্ত্ৰ সক্ৰিয় কৰিব পৰা প্ৰ’টিন অণু সম্পৰ্কীয় তেওঁ নেতৃত্ব দিয়া এক গৱেষণা আগষ্ট মাহৰ ১ তাৰিখে বিশ্ববিখ্যাত জাৰ্ণেল Cell’ত প্ৰকাশিত হৈছে।
ইয়াত কৃত্ৰিম বুদ্ধিমত্তাৰ সহায়ত নিৰ্মিত প্ৰ’টিন অণুৰে সক্ৰিয় কৰিব পাৰিব মানুহৰ প্ৰতিৰোধ তন্ত্ৰ, সেই বিষয়ে সবিশেষ তথ্য দিয়া হৈছে। কৰ্কট কোষ অথবা বীজাণু ধ্বংসকাৰী আমাৰ শৰীৰৰ টি-লিম্ফচাইট সৃষ্টি কৰাত সহায় কৰিব পাৰিব এই কৃত্ৰিম প্ৰ’টিন অণুৱে। এই পত্ৰিকাত কোৱা হৈছে যে, আমাৰ শৰীৰটো এক যুদ্ধক্ষেত্ৰৰ দৰে। ক্ষুদ্ৰ ক্ষুদ্ৰ বীজাণু যেনে ভাইৰাচ, বেক্টেৰীয়াই অহৰহ শৰীৰ আক্ৰমণ কৰি থাকে। তদুপৰি আমাৰ শৰীৰৰ নিজৰ কোষেই আকৌ কেতিয়াবা বিপথে গৈ আমাক ৰুগীয়া কৰি তোলে—যেনে কৰ্কট কোষ আৰু ডায়েবেটিছৰ ক্ষেত্ৰত কিছুমান প্ৰতিৰোধ তন্ত্ৰৰ কোষ।
এই আটাইবোৰ আক্ৰমণৰ বিৰুদ্ধে অহৰহ যুঁজ দি থকা আমাৰ প্ৰতিৰোধ তন্ত্ৰৰ প্ৰধান সৈনিক স্বৰূপ কোষবিধেই হৈছে টি লিম্ফছাইট বা টি কোষ। তেজৰ প্ৰবাহত অহৰহ এঠাইৰ পৰা আন ঠাইলৈ, অতন্দ্ৰ প্ৰহৰীৰ দৰে, টহল দি থাকে। এই কোষবোৰে যাতে আক্ৰমণকাৰী অণুজীৱ অথবা কৰ্কটৰ দৰে স্বয়ং নিজ দেহৰ অপকাৰী কোষকো প্ৰতিহত কৰিব পাৰে। এই ক্ষেত্ৰত কৃত্ৰিম বুদ্ধিমত্তাৰ সহায়ত প্ৰ’টিন অনুৱে কিদৰে সহায় কৰিব সেই সন্দৰ্ভত তেওঁ এটি লেখা প্ৰকাশ কৰিছে।
দৰিদ্ৰতা, ঘাত-প্ৰতিঘাত, সকলো ধৰণৰ প্ৰতিবন্ধকতা নেওচি চিকিৎসা বিজ্ঞানৰ এক উজ্জ্বল নক্ষত্ৰলৈ পৰিগণিত হোৱা ড ° ৰুবুল মাউতৰ এই যুগান্তকাৰী আৱিষ্কাৰে মানৱ জীৱনৰ এক নতুন আশাৰ সঞ্চাৰ কৰিছে।
