মহানগৰীত লোমহৰ্ষক ডকাইতি কাণ্ড সংঘটিত হৈছে। মাতৃ-পুত্ৰৰ হাত-ভৰি বান্ধি ডকাইতৰ দলে লুটি নিলে নগদ ধন, সোণৰ আ-অলংকাৰ। নিশা শুই থকা সময়ত ডকাইতৰ দলটোৱে ঘৰত প্ৰৱেশ কৰি মাতৃ-পুত্ৰক চোকা অস্ত্ৰ দেখুওৱাই লুটপাট কৰে।
মহানগৰীৰ নুনমাটিত সংঘটিত হৈছে এই ঘটনা।
জানিব পৰা মতে, নুনমাটিৰ ১ নং আনন্দ নগৰত বাস কৰা এগৰাকী বিধৱা মহিলাই নিশা ভাত-পানী খাই ১৫ বছৰীয়া পুত্ৰক লগত লৈ বিছনাত শুই যায়। পুৱতি নিশা প্ৰায় ২:৩০ বজাত ছয়জনীয়া ডকাইতৰ এটা দলে পাকঘৰৰ খিড়িকী ভাঙি ঘৰৰ ভিতৰত প্ৰৱেশ কৰে।
ডকাইতৰ দলটোৱে কোঠাত প্ৰৱেশ কৰি প্ৰথমে মাতৃ-পুত্ৰৰ মুখত সোপা দি ডিঙিত অস্ত্ৰ লগাই চিঞৰ-বাখৰ নলগাবলৈ ভাবুকি দিয়ে। ইয়াৰ পিছত ডকাইতৰ দলটোৱে আলমিৰাৰ পৰা নগদ ধন আৰু প্ৰায় ৪ লাখ টকাৰ সোণৰ আ-অলংকাৰ লুটি নিয়ে।
ডকাইতৰ দলটোৱে মুখত কলা কাপোৰ বান্ধি লুটপাট কৰিবলৈ আহে বুলি মহিলাগৰাকীয়ে আৰক্ষীৰ সন্মুখত জনায়।
বৰ্তমান নুনমাটি থানাত এজাহাৰ দাখিল কৰা হৈছে আৰু আৰক্ষীয়ে এজাহাৰৰ ভিত্তিত তদন্ত আৰম্ভ কৰিছে। অৱশ্যে, আৰক্ষীয়ে ডকাইতৰ দলে এৰি যোৱা এযোৰ চেণ্ডেল, এপাত লোৰ চাবোল আৰু এটা ভঙা তলা জব্দ কৰিছে।
উল্লেখ্য যে, কিছুদিন পূৰ্বে মহিলগাৰাকীয়ে ঘৰৰ ওচৰৰ এক কঠা পাঁচ লেচা ভূমি ৮০ লাখ টকাত বিক্ৰী কৰিছিল। উক্ত ৮০ লাখ টকা লুট কৰিবলৈ ছয়জনীয়া ডকাইতৰ দলে মুখত কলা কাপোৰ বান্ধি ডকাইতি কৰিবলৈ অহা বুলি পৰিয়ালে সন্দেহ প্ৰকাশ কৰিছে।
